ބަންގްލަދޭޝްގައި މިއަދު ރާއްޖެވަނީ އެ ގައުމާ ދެކޮޅަށް ކުޅުނު ފްރެންޑްލީ މެޗުން މޮޅުވެފައެވެ. މިއީ ބަންގްލަދޭޝްގައި އެ ގައުމު އަތުން ރާއްޖެ މޮޅުވީ ފުރަތަމަ ފަހަރެވެ.
ގައުމީ ޓީމުގެ ކުޅުންތެރިންވަނީ މެޗުގެ ނަތީޖާ ގައުމީ ޓީމުގެ ކުރީގެ ހުނަރުވެރި ކުޅުންތެރިޔާ ބަކާއަށް ހާއްސަކޮށްފައެވެ. ބަކާވަނީ ކުރިން ބަންގްލަދޭޝްގައި ގައުމީ ޓީމާއެކު އެތައް ފަހަރަކު ކުޅެފައެވެ.
އުމުރުން އެންމެ 38 އަހަރުގައި ބަކާ ކުއްލި ގޮތަކަށް ނިޔާވީ މިދިޔަ ޖޫން މަހުއެވެ.
ބަކާ ވަނީ ރާއްޖޭގެ ފުރަތަމަ ޑިވިޝަނުގައި ގިނަ ކްލަބްތަކަކަށް ކުޅެފަ އެވެ. އޭގެ ތެރޭގައި، ނިއު ރޭޑިއަންޓް ސްޕޯޓްސް ކްލަބް، ވިކްޓަރީ ސްޕޯޓްސް ކްލަބް، ކްލަބް ވެލެންސިއާ، ވީބީ އައްޑޫ އެފްސީ، ކްލަބް އީގަލްސް، ކްލަބް ގްރީން ސްޓްރީޓްސް އަދި މާޒިޔާ ސްޕޯޓްސް އެންޑް ރެކްރިއޭޝަން ހިމެނެ އެވެ. އޭނާ ވަނީ މިޔަންމާގެ ކޭބީޒެޑް އަށް ވެސް ކުޅެފަ އެވެ.
ގައުމީ ޓީމުން، 2008 އާއި 2018 ވަނަ އަހަރު ސާފް ޗެމްޕިއަންޝިޕް ކާމިޔާބުކުރި ޓީމުގައި ބަކާ ހިމެނުނެވެ. ބަކާ، އެންމެ ފަހުން ގައުމީ ޓީމަށް ކުޅެފައިވަނީ، 2021 ވަނަ އަހަރު، ސާފް ޗެމްޕިއަންޝިޕަށް ނެގި ޕްރިލިމިނަރީ ސްކޮޑުގައި ހިމެނިގެންނެވެ.
ފަހުގެ ތާރީޚެއްގައި ދިވެހި ފުޓުބޯޅައިން ފެނުނު އެންމެ ހުނަރުވެރި، ވިދުންގަދަ، ފުޓުބޯޅައިގައި ދިވެހިރާއްޖެއަށް ހޯދުނު އެންމެ ބޮޑު ކާމިޔާބުގެ މުހިއްމު ހިއްސާދާރު، ހުނަރުވެރި މިޑްފީލްޑަރު މުހައްމަދު އާރިފް (ބަކާ) ނިޔާވުމަކީ ދިވެހި ފުޓުބޯޅަ އާއިލާއަށް، އަދި ދިވެހި ކުޅިވަރަށް ލިބިގެންދިޔަ ފޫނުބެއްދޭވަރުގެ ގެއްލުމެއް ކަމަށް ގިނަ ބަޔަކު ގަބޫލު ކުރެއެވެ.
