ފީފާ ރަޖިސްޓާޑް އެކުވެރިކަމުގެ މެޗެއްގައި އިއްޔެ ރާއްޖޭންވަނީ ބަންގްލަދޭޝްގައި ބަންގްލަދޭޝް ބަލިކޮށްފައެވެ. މި މެޗުން ރާއްޖެ މޮޅުވީ އެއް ލަނޑު ސުން ލަނޑުންނެވެ. އިއްޔެގެ މެޗަށް ފަހު ބޭއްވި ނޫސްވެރިންގެ ބައްދަލުވުމުގައި، ކަބްރޭރާ ބުނީ، މި ކުރެވޭ އިހުސާސް ބުނެދޭންވެސް އުނދަގޫ ކަމަށެވެ.
"ވަރަށް އުނދަގޫ ހަގީގަތުގައި މި ކުރެވޭ އިހުސާސް ބުނެދޭން. އެއީ އަހަރެމެން ވަރަށް ރަނގަޅަށް ކުޅެ، މަސައްކަތް ކޮށްފައި އެއްޗެއް ހާސިލްނުވެ މިދިޔައީ"
ބަންގްލަދޭޝާއި ރާއްޖެ ކުޅޭ އެކުވެރިކަމުގެ ދެ ވަނަ މެޗު އޮންނާނީ ހޮނިހިރު ދުވަހު ހަވީރު އެވެ. ކަބްރޭރާ ވަނީ އެ މެޗުން މޮޅުވާން ވަރަށް ގިނަ ކަންކަން ބަންގްލަދޭޝް އިން ރަނގަޅުކުރަން ޖެހޭ ކަމަށް ބުނެފަ އެވެ.
ބަންގްލަދޭޝްގެ ވެރިރަށް ޑާކާގެ ބަޝުންދަރާ އެރީނާގައި ކުޅުނު މެޗަކީ ގާތްގަނޑަކަށް އަހަރެއް ފަހުން ގައުމީ ޓީމުން ކުޅުނު ފުރަތަމަ މެޗެވެ. މީގެ ކުރިން ބަންގްލަދޭޝްގައި ރާއްޖޭން ވަނީ އެ ޓީމާ ދެކޮޅަށް ފަސް ފަހަރު ކުޅެފަ އެވެ. އެއީ، 1985 ވަނަ އަހަރުގެ ސާފް ގޭމްސްގައި 8-0 އިން ރާއްޖެ ބަލިވި މެޗާއި 1995 ވަނަ އަހަރު އެކުވެރިކަމުގެ މެޗެއްގައި 0-0 އިން އެއްވަރުވި މެޗާއި 2003 ވަނަ އަހަރު ބަންގްލަދޭޝްގައި ބޭއްވި ސާފް ޗެމްޕިއަންޝިޕްގެ ގްރޫޕް ސްޓޭޖުގައި 1-0 އިން ރާއްޖެ ބަލިވި މެޗާއި، އެ ފަހަރު ފައިނަލުގައި ޕެނަލްޓީ ޖަހައިގެން ރާއްޖެ ބަލިވި މެޗުގެ އިތުރުން، މިދިޔަ އަހަރުގެ ވޯލްޑް ކަޕް/އޭޝިއަން ކަޕް ޖޮއިންޓް ކޮލިފައިންގައި، 2-1 އިން ރާއްޖެ ބަލިވި މެޗެވެ.
