ހަންބޯ ކޮމްޕެނީ ޕްރައިވެޓް ލިމިޓެޑުން ހުޅުމާލޭގައި ތަރައްގީ ކުރަމުންދާ ކޭ-ޕާރކް ރެޒިޑެންސްގެ އެޕާޓްމަންޓްތައް ވިއްކުމުގައި އޮޅުވާލުމާއި، މަކަރާއި ހީލަތުން ވިއްކައިގެން ހޯދާފައިވާކަމަށް ބެލެވޭ އަގުބޮތެޓި މުދާތަކަށް މަމްދޫހުގެ އަތުން ހޯދާ ފުލުހުން ވަނީ ހިފަހައްޓާފައެވެ.
އޭގެތެރޭގައި 7 މިލިއަން ރުފިޔާގެ ޕެންޓް ހައުސްއަކާއި އަގު ބޮޑެތި މުދާތައް ހިމެނެއެވެ. މި ޕެންޓްހައުސްއާއި އެ ތަނުގައި ހުރި އަގު ބޮޑު މުދާތައް ހުރީ ފުލުހުންގެ ބެލުމުގެ ދަށަށް ގެނެސްފައެވެ. އެއީ ހުޅުމާލެ މެޖިސްޓްރޭޓް ކޯޓުން މީގެ އަހަރެއްހާ ދުވަސް ކުރިން ނެރުނު އަމުރެއްގެ ދަށުންނެވެ. އެ އަމުރުގެ މުއްދަތު މާދަމާ ހަމަވާނެއެވެ.
މި މައްސަލާގައި މިއަދު ކްރިމިނަލް ކޯޓުގައި ބޭއްވި ޝަރީއަތުގައި ފުލުހުން އެދުނީ އެތަކެތި ޝަރީތައް ނިމެންދެން ހިފަހައްޓާ ދިނުމަށެވެ. ކޯޓުން ވަނީ ފުލުހުން އެދުނު ގޮތަށް އަމުރު ނެރެދީފައެވެ.
ކޭޕާކް މައްސަލައިގައި މަންޑޭއާއެކު ދެން ދައުވާ ކުރަނީ، ރ. އަލިފުށި ކިނާރާ، ޖައިޝާން ސައީދުގެ މައްޗަށެވެ.
ޕީޖީ އޮފީހުން މިއަދު ބުނި ގޮތުގައި މި ދެ މީހުންގެ މައްޗަށް އުފުލާފައިވަނީ ހަންބޯ ކޮމްޕެނީ ޕްރައިވެޓް ލިމިޓެޑުން ހުޅުމާލޭގައި ތަރައްގީ ކުރަމުންދާ ކޭ-ޕާރކް ރެޒިޑެންސްގެ އެޕާޓްމަންޓްތައް ވިއްކުމުގައި އޮޅުވާލުމާއި، މަކަރާއި ހީލަތް ހަދާފައިވާކަމަށް ތުހުމަތުކުރެވޭ މައްސަލައިގައި، ފުލުހުން ތަހުގީގު ފުރިހަމަކޮށް ހުށަހަޅާފައިވާ ގެއްލުން ލިބުނު 51 މީހުންނާ ގުޅިގެން ކަމަށެވެ.
