ބެޑްމިންޓަން އެސޯސިއޭޝަންގެ ހިންގުން ކުޅިވަރާ ބެހޭ ގައުމީ މަޖިލީހަށް ހަވާލުކުރަން ކޮމިޝަނާ އޮފް ސްޕޯޓްސް އިން ނިންމި ނިންމުން، އެ އެސޯސިއޭޝަނުން ސިވިލް ކޯޓަށް ހުށަހެޅީ، މުއްދަތު ހަމަވެފައިވާ ބެޑްމިންޓަން އެސޯސިއޭޝަންގެ ހިންގާ ކޮމިޓީންނެވެ. އެ މައްސަލަ ކޯޓުން ބޭރުކޮށްލީ، ހިންގާ ކޮމިޓީގެ މުއްދަތު ހަމަވެފައިވާތީ އެ މައްސަލަ ހުށަހެޅުމުގެ ބާރު ހިންގާ ކޮމިޓީގައި ތިބި މެންބަރުންނަށް ނެތަތީއެވެ.
ސިވިލް ކޯޓުން އެ މައްސަލަ ބޭރުކޮށްލިއިރު، ކޮމިޝަނަރުގެ ނިންމުމަށް އަމަލު ކުރުން ފަސް ކުރުމަށް ކުރިން އެސިއޭޝަނުން އަމުރަކަށްވެސް އެދުނެވެ. އެ އަމުރު ނުދޭން ސިވިލް ކޯޓުން ނިންމުމުން އެ މައްސަލަވަނީ ހައިކޯޓަށް ހުށަހަޅާފައެވެ.
ބެޑްމިންޓަން އެސޯސިއޭޝަންގެ ރައީސްގެ މަގާމުގައި މޫސަގެ ތިން ވަނަ ދައުރުގެ ރަސްމީ މުއްދަތު ހަމަވިތާ ހަތަރު މަސް ފަހުން އޭނާ މިދިޔަ މަހު ވަނީ މަގާމުން އިސްތިއުފާ ދީފަ އެވެ. މޫސަ އާއި ބެޑްމިންޓަން އެސޯސިއޭޝަނާ ގުޅޭ ކޮރަޕްޝަންގެ މައްސަލައެއް އެންޓި ކޮރަޕްޝަން ކޮމިޝަން (އޭސީސީ) އިން އަންނަނީ ތަހުގީގު ކުރަމުންނެވެ.
