ދިރާގުން ބުނީ، މި އެކްސްޕޯ އަކީ މާދަމާ (15) އާއި ހޮނިހިރު (16) ވަނަ ދުވަހު ހުޅުމާލޭ ސެންޓްރަލް ޕާކުގައި ބާއްވާ އެކްސްޕޯއެއް ކަމަށެވެ. އަދި މި އެކްސްޕޯގައި ސަރުކާރުގެ އެކިއެކި މިނިސްޓްރީތަކާއި އިދާރާތަކާއި އެކި ކުންފުނިތަކުގެ އިތުރުން ޔުނިވާސިޓީތަކާއި، ކޮލެޖްތަކާއި، މަތީ ތައުލީމުދޭ މަރުކަޒުތައް ބައިވެރިވާނެ ކަމަށް ވަނީ ބުނެފައެވެ.
ދިރާގުން ބުނީ، މި އެކްސްޕޯގައި ކެރިއާ ގައިޑެންސާއި، މަތީ ތަޢުލީމުގެ ފުރުސަތުތަކާއި، ހުނަރު ތަރައްގީކުރުމާ ގުޅޭ ގޮތުން މައުލޫމާތު ފޯރުކޮށްދިނުމަށް ނިންމާފައިވާ ކަމަށެވެ.
ދިރާގުން ބުނީ، ޒުވާނުން ބާރުވެރިކުރުވައި، ކުރިއަށް ދިއުމަށް ބޭނުންވާ ދާއިރާއިން ކުރިއަށް ދިއުމަށް މަގުފަހިކޮށްދިނުމަކީ ދިރާގުގެ ކޯޕަރޭޓް ސޯޝަލް ރެސްޕޮންސިބިލިޓީ (ސީއެސްއާރު) ޕްރޮގްރާމްގެ މުހިންމު އަމާޒެއް ކަމަށެވެ. އެހެން ކަމުން މި ޕާޓްނާޝިޕުން އެކުންފުނިން ހުނަރުތަކަށް ދޭ އަހައްމިއްޔަތުކަން ދައްކުވައިދޭ ކަމަށް ދިރާގުން ވަނީ ބުނެފަ އެވެ.
ނޭޝަނަލް ސްކިލްސް އެންޑް ކެރިއާ އެކްސްޕޯ 2024 ގައި ދިރާގުގެ ސްޓޯލެއްވެސް ހުންނާނެ ކަމަށް ދިރާގުން ވަނީ ބުނެފައެވެ. އެ ސްޓޯލުން ކުންފުނީގައި ހުރި ވަޒީފާގެ ފުރުސަތުތަކާއި އެޕްރެންޓިސްޝިޕް ޕްރޮގްރާމާ ބެހޭ މަޢުލޫމާތު ލިބެން ހުންނާނެ ކަމަށް ދިރާގުން ވަނީ ބުނެފައެވެ.
