އެމްޑީއޭގެ ނައިބު ރައީސް އައްބާސް ވިދާޅުވީ ރައީސް މުހައްމަދު މުއިއްޒުގެ ވެރިކަމަށް އަހަރެއް ވީއިރު ރައްޔިތުންނަށް އެއްވެސް ކަމެއް ނުކޮށްދެވޭ ކަމަށެވެ. އަދި ޓެކްސް ދައްކާ މީހުންނާ ދެކޮޅަށް ގަދަކަން ދައްކަނީ ދުނިޔޭގެ ކޮން ގައުމަކުންތޯ ވެސް އޭނާ ސުވާލު އުފެއްދެވި އެވެ.
ސޯޝަލް މީޑިއާގައި ކުރެއްވި ޕޯސްޓުތަކުގައި އައްބާސް ވިދާޅުވީ ރައީސް މުއިއްޒަކީ ބޮޑާ، ކިބުރުވެރިއެއްގެ ގޮތުގައި ސިފަކުރައްވައި، އެމަނިކުފާނުގެ ވައުދުތައް ނުފުއްދުމަކީ ރައްޔިތުންނާއި ޓެކްސް ދައްކާ މީހުންނާ ޖެއްސުމަށް ލިބޭ ހުއްޖަތެއްތޯ ވެސް ސުވާލު އުފެއްދެވި އެވެ.
އައްބާސް މި ފާޑުކިޔުންތައް އަމާޒުކުރައްވަނީ އެމްޑީއޭގެ ގިނަ އަދަދެއްގެ ސިޔާސީ މުވައްޒަފުންތަކެއް ސަރުކާރުން ވަކިކުރުމަށްފަހު އެވެ. އެމްޑީއޭއަކީ ސަރުކާރާއެކު މަސައްކަތްކުރާ ޕާޓީއެއް ކަމަށް ވީ ނަމަވެސް، އެ ޕާޓީގެ ލީޑަރު އަހުމަދު ސިޔާމް މުހައްމަދު ވަނީ 2028 ގެ ރިޔާސީ އިންތިހާބުގައި ވާދަކުރައްވަން ނިންމަވާފައެވެ.
