އެންމެ ޒުވާން މަސްވެރިޔާއާ އެންމެ ދުވަސްވީ ކެޔޮޅެއް ހޮވާ ކޮންމެ އަހަރެއްގެ މަސްވެރިންގެ ދުވަހު އަންނަނީ އެވޯޑް ދެމުންނެވެ.
މަސްވެރިކަމާއި ބެހޭ ވުޒާރާއިން ބުނީ މަސްވެރިން ދުވަހުގެ މުނާސަބާތުގައި ކޮންމެ އަހަރަކުވެސް ބާއްވަމުން އަންނަ ރަސްމީ ޖަލްސާގައި މަސްވެރިކަމުގެ ދާއިރާއަށް އެކި ގޮތްގޮތުން ހިދުމަތް ކޮށްދެއްވާފައިވާ ފަރާތްތަކުގެ އަގުވަޒަން ކޮށް، ދޭ އެވޯޑށް ޑިޒައިން ކޮށްދޭނެ ފަރާތެއް ބޭނުންވާކަމަށެވެ.
ވުޒާރާއިން ބުނީ އެވޯޑް ޑިޒައިން ކުރަންވާނީ މަސްވެރިންގެ ދުވަހުގެ ޝިއާރު (މަސްވެރިކަމުގެ ސިނާއަތު ސިންދަފާތުކުރުމުގައި ޒުވާނުންގެ ބައިވެރިވުން ) މި ޝިއާރާ މަސްވެރިކަމުގެ ސިނާއަތް އެކަށީގެންވާ ގޮތެއްގައި ރަމްޒު ކޮށްދޭ ގޮތަށްކަމަށެވެ.
މިގޮތުން ޑިޒައިން އިހްތިޔާރު ކުރުމުގައި ޒަމާނުއްސުރު ދެމެހެއްޓެނިވި ގޮތުއްގައި ދިވެހިން ކުރަމުން އައިސްފައިވާ ދޮށީގެ މަސްވެރިކަމާއި، މަސްވެރިކަމުގެ ސިނާއަތް ސިންދަފާތު ކުރުމުގެ މުހިންމުކަން ދައްކުވައިދޭ ޒަމާނީ އަދި އިޖާދީ ހުށަހެޅުންތަކަށް އިސްކަންދޭންވާނެކަަމަށްވެސް މަސްވެރިކަމާއި ބެހޭ ވުޒާރާއިން ބުނެއެވެ.
އެވޯޑުގެ ދިގުމިނުގައި މަދުވެގެން 1 ފޫޓް ހުންނަންވާނެކަމަށާއި 1.5 ފޫޓްއަށްވުރެ އެވޯޑް ދިގުވެގެން ނުވާނެކަމަށްވެސް ވުޒާރާއިން ބުނެއެވެ.
އެވޯޑަށް ހުށައަޅާ ޑިޒައިންތަކުން އެއްވަނަ އަށްދާ ޑިޒައިނަކަށް 15،000 ރުފިޔާގެ ފައިސާގެ އިނާމެއް ދިނުމަށް ހަމަޖެހިފައިވާކަމަށްވެސް މަސްވެރިކަމާއި ބެހޭ ވުޒާރާއިން ބުނެއެވެ. މި އެވޯޑް ޑިޒައިން ކުރަން ބޭނުންވާ ފަރާތްތަކުން ޕްރޮޕޯސަލް ހުށަހެޅުމުގެ ސުންގަޑިއަކީ މިމަހުގެ 20 ވަނަދުވަހު 12:00 ކަމަށް މަސްވެރިކަމާއި ބެހޭ ވުޒާރާއިން ބުނެއެވެ.
