މަޖިލީހުގެ މިއަދުގެ ޖަލްސާގައި ބަޖެޓުގެ ބަހުސް ކުރިއަށް ދިޔައިއިރު، މިނިސްޓަރު ޒަމީރު ވަނީ މެންބަރުންގެ ވާހަކަތައް އަޑުއެއްސެވުމަށް ހާޒިރުވެވަޑައިގެންފައެވެ.
ޒަމީރު ވިދާޅުވީ ޕީއެސްއައިޕީ ޕްރޮޖެކްޓް ލިސްޓުގައި ކުޑަ އަދަދެއް ޖެހުމުން އެ މަސައްކަތް ކުރިއަށް ނުގޮސް ހުންނަތަން މީގެ ކުރީގެ ބަޖެޓުތަކުން ފާހަގަވާ ކަމަށެވެ. އަދި ބަޖެޓުގައި ޖާގަ ނެތިގެން ނުވަތަ ކޭޝް ފްލޯ ނެތިގެން ޕްރޮޖެކްޓްތައް ހުންނަތަން ފެންނަ ކަމަށް އޭނާ ވިދާޅުވި އެވެ.
އިތުރަށް ޒަމީރު ފާހަގަކުރެއްވީ މިހާރު ސަރުކާރުން ގެންގުޅޭ ވިސްނުމަކީ މަޝްރޫއުތައް ފެށުމުގެ ކުރިން ކުރަންޖެހޭ މަސައްކަތް ޕްރޮޖެކްޓަށް ތައްޔާރުވުމަށް އެކަށައަޅާ ފަންޑުގެ ތެރެއިން ފުރިހަމަކުރުމަށްފަހު ރައީސް ޑރ.މުހައްމަދު މުއިއްޒު އިސްކަންދެއްވާ މަޝްރޫއުތަކުގެ ތަރުތީބުން މަސައްކަތްތައް ކުރިއަށްގެންދެވުން ކަމަށެވެ.
އެގޮތަށް މަސައްކަތްކުރާއިރުވެސް އެއްވެސް ރަށެއް އުނިވެފައި ނޯންނާނެކަމުގެ ޔަގީންކަން ދެއްވަމުން ޒަމީރު ވިދާޅުވީ ހުރިހާ ރަށެއްގައ އަދި ސިޓީއެއްގައިވެސް ތަރައްގީގެ މަޝްރޫއުތައް ކުރިއަށްގެންދާނެ ކަމަށެވެ.
މިއަހަރު ޕީއެސްއައިޕީއަށް 11 ބިލިއަން ރުފިޔާ ބަޖެޓުކޮށްފައިވެ އެވެ. މިއީ މިއަހަރަށް އެންމެ ފުރަތަމަ ހުށަހެޅި ބަޖެޓުގެ އަދަދަށް ވުރެ އިތުރު އަދަދެކެވެ. އޭގެ ތެރޭގައި ގާތްގަނޑަކަށް 3،000 އެއްހާ މަޝްރޫއު ހިމެނެ އެވެ.
