ރޭ ނޯވޭ، ކަޒަކިސްތާނު އަތުން މޮޅުވީ ފަސް ލަނޑު ސުން ލަނޑުންނެވެ. ނޯވޭ ވަނީ ލީގު ބީގެ ގްރޫޕު ތިނެއްގައި ކުޅުނު ހަ މެޗުން 13 ޕޮއިންޓާއެކު ގްރޫޕުގެ އެއްވަނަ މަގާމް ހޯދާފަ އެވެ. ދެވަނައިގައި އޮތް އޮސްޓްރިއާއަށް ހަ މެޗުން 11 ޕޮއިންޓް ލިބިފައިވާއިރު ސްލޮވޭނިއާއަށް ލިބިފައިވަނީ 8 ޕޮއިންޓެވެ. އަދި ކަޒަކިސްތާނަށް ލިބިފައިވަނީ އެންމެ ޕޮއިންޓެކެވެ.
ރޭގެ މެޗުގައި ހާލަންޑް ހެޓްރިކެއް ހެދިއިރު، އޭނާ ނޭޝަންސް ލީގުގެ ގްރޫޕް ސްޓޭޖުގައި ކުޅުނު ހަ މެޗުގައި އޭނާ ޖެހި ލަނޑުގެ އަދަދުވަނީ ހަތަކަށް އަރާފައެވެ. މި މުބާރާތުގައި އެންމެ ގިނަ ލަނޑު ޖަހާފައިވަނީ ވެސް ހާލަންޑު އެވެ. މި މެޗުގައި ޖެހި ތިން ލަނޑާއެކު ހާލަންޑް ވަނީ ގައުމީ ޓީމަށް ކުޅުނު 39 މެޗުގައި 38 ލަނޑު ޖަހާފަ އެވެ.
މި ގްރޫޕުގައި ދެން ހިމެނޭ އޮސްޓްރިއާ އާއި ސްލޮވޭނިއާ ބައްދަލުކުރި މެޗު ނިމިފައިވަނީ 1-1 ގެ ނަތީޖާއަކުން ދެ ޓީމު އެއްވަރުވެގެންނެވެ.
