ރައީސް މިހެން ވިދާޅުވީ ސަރުކާރަށް 1 އަހަރު ދުވަސް ފުރުމާ ގުޅިގެން ރޭ ބޭއްވި ހާއްސަ ރަސްމިޔާތުގަ އެވެ.
މޯލްޑިވިއަން އަށް ވައިޑް ބޮޑީ އެއާ ކްރާފްޓުތައް ގެެނެވި އަންނަ އަހަރު ޖެނުއަރީ މަހުގެ ކުރީކޮޅު އެ ފްލައިޓްތަކުން އުދުހުންތައް ފަށާނެ ކަމަށް ރައީސް ވިދާޅުވި އެވެ.
އަދި އޭގެ ދަރުތައް ފުޅާ ކުރެވިގެންގޮސް އަންނަ އަހަރުގެ ތެރޭގައި ޗައިނާއާއި ޔޫރަޕްގެ ޑެސްޓިނޭޝަންތަކަށް މޯލްޑިވިއަންގެ ވައިޑް ބޮޑީ އެއާ ކްރާފްޓް ދަތުރުކުރާނެ ކަމަށްވެސް ރައީސް ވިދާޅުވިއެވެ.
"ސީއެންއެމް" އަށް މައުލޫމާތު ދެމުން މޯލްޑިވިއަންގެ އޮފިޝަލެއް ވިދާޅުވީ ވަކި ތާރީހެއް އަދި ނޭންގުނު ނަމަވެސް ޑިސެންބަރު މަސް ތެރޭ ވައިޑް ބޮޑީ އެއާކްރާފްޓުތައް ރާއްޖޭއަށް ގެނެވޭނެކަމަށެވެ.
މޯލްޑިވިއަނުން ބައިނަލްއަގުވާމީ ދަތުރުތައް މިހާރު ކުރަމުންދަނީ ބަންގްލަދޭޝްގެ ޑާކާ، އިންޑިއާގެ ޓްރިވެންޑްރަމް، ކޮޗިން އަދި ބެންގަލޫރުގެ އިތުރުން ސްރީ ލަންކާގެ ކޮލޮމްބޯ އަށެވެ.
މި ވަގުތު މޯލްޑިވިއަންގެ ފްލީޓުގައި، ސީޕްލޭނާއެކު 24 ބޯޓު އެބަ އޮތެވެ. އޭގެ ތެރޭގައި އެއާބަސް އޭ320 މަރުކާގެ އެއް ބޯޓާއި އޭޓީއާރްގެ ދެ ބޯޓު ވެސް ހިމެނެ އެވެ. ބާކީ ހުރީ ޑޭޝް މަރުކާގެ ބޯޓުތަކެވެ. ބޭރު ދަތުރުތައް ކުރުމުގައި ގެންގުޅެނީ އެއާބަސް އޭ320 މަރުކާގެ ބޯޓު އެކަންޏެވެ.
މޯލްޑިވިއަން އިން މި ވަގުތު ދަތުރުކުރަނީ ރާއްޖޭގެ 16 މަންޒިލަކާއި އިންޑިއާގެ ތިން ސަރަހައްދަކާއި ލަންކާ އަދި ބަންގްލަދޭޝަށެވެ.
