ރިޕޯޓްތައް ބުނާ ގޮތުން، ކުރީގެ ކުޅުންތެރިޔާ އަދި މިހާރުގެ ވިޔަފާރިވެރިޔާ ރޮނާލްޑޯ ނަޒާރިއޯ ބޭނުންވަނީ ބްރެޒިލްގެ ފުޓްބޯޅަ ކޮންފެޑެރޭޝަންގެ ސީބީއެފްގެ ރައީސް ކަމާއި، އަދި އެއަށް ފަހު ބްރެޒިލްގެ ގައުމީ ޓީމު ލީޑް ކުރުމަށް ކޯޗު ޕެޕް ގާޑިއޯލާ ސޮއިކުރުމަށެވެ. ބްރެޒިލްގެ ފުޓްބޯޅަ ފެޑޭރޭޝަންގެ ރައީސްގެ އިންތިހާބު އަންނަ އަހަރު އޮންނާނެއެވެ.
ބްރެޒިލްގެ ފުޓްބޯޅައިގެ ރައީސް ހޮވުމަށް ބާއްވާ އިންތިހާބު އަންނަ އަހަރު އޮތްނަމަވެސް، މިހާރުގެ ރައީސްގެ ދައުރު ހަމަވާނީ 2026 ވަނަ އަހަރުއެވެ. ރިޕޯޓްތައް ބުނާ ގޮތުން، މިހާރުގެ ރައީސް އެޑްނަލްޑޯ އެ މަގާމު ދިފާއު ކުރަން ބޭނުންވެއެވެ. އެހެންނަމަވެސް ދުނިޔޭގެ ފުޓްބޯޅައިގެ ގަދަ ބާރެއްގެ ގޮތުގައި ކުރިން އޮތް ބްރެޒިލްއަށް މި ފަހުން ރަނގަޅު ކާމިޔާބެއް ނުލިބޭތީ، އެޑްނަލްޑޯއަށް ރޮނާލްޑޯ ވެގެންދާނީ ވަރުގަދަ ޗެލެންޖަކަށެވެ.
ރޮނާލްޑޯއާ ގާތް މީހުންނާ ހަވާލާދީ ބައެއް ރިޕޯޓްތައް ބުނާ ގޮތުގައި ރޮނާލްޑޯގެ މައިގަނޑު އަމާޒަކީ ބްރެޒިލްއަކީ އަލުން ދުނިޔޭގެ ފުޓްބޯޅައިގެ އެއްވަނަ މަގާމަށް ގެނެސް ވޯލްޑްކަޕް ކާމިޔާބު ކުރުމެވެ. މި އަމާޒަށް ވާސިލުވުމަށް ރޮނާލްޑޯގެ ޕްލޭނުގައި ގާޑިއޯލާ ހިމެނޭ ކަމަށްވެއެވެ.
ރޮނާލްޑޯވަނީ މީގެ ކުރިންވެސް ބްރެޒިލްގެ ފުޓްބޯޅައިގެ ރައީސްކަމުގެ މަގާމަށް ޝައުގުވެރިވާކަން ހާމަކޮށްފައެވެ. އެކަމަކު އެ މަގާމު ހޯދުމުގެ ބަދަލުގައި އޭނާ ބޮޑަށް އުޅުނީ ސްޕެއިންގައި ފުޓްބޯޅަ ކްލަބެއް ހިންގުމަށެވެ.
