އިމިގްރޭޝަނުގެ ކޮންޓްރޯލާ މުހައްމަދު ޝަމްއާން ވަހީދު ވިދާޅުވީ ގަވައިދާ ހިލާފަށް އުޅޭ ބިދޭސީން ހޯދުމަށް ހިންގާ އޮޕަރޭޝަންގައި އެ އިދާރާގެ އޮފިސަރުންނާއި ފުލުހުން މާލޭގެ ފަޅުގަައި އޮތް މަސްދޯނިތަކަށް އަރާފައިވާކަމަށެވެ. އެގޮތުން މި ދޯނިތަކަށް އެރީ މަސް މާރުކޭޓު ސަރަހައްދުގައި ބިދޭސީން ވިޔަފާރިކޮށް ކޮންޓްރޯލް ކުރަމުންދިޔަ މަސް ބޯޓުތަކާއި ގުޅިގެން ގިނަ ބަޔަކު ކަންބޮޑުވުން ފާޅުކޮށްފައިވާތީކަމަށް ޝަމްއާން ވިދާޅުވިއެވެ.
މަސް ދޯނިތަކަށް އަމާޒުކޮށްގެން ހިންގި އޮޕަރޭޝަންގައި މަސްވެރިަކަމުގައި ގަވައިދާ ހިލާފަށް އުޅުނު 39 ބިދޭސީއަކު ހައްޔަރުކޮށްފައިވާކަމަށް ކޮންޓްރޯލާ މުހައްމަދު ޝަމްއާން ވިދާޅުވިއެވެ.
މާލޭ ފަޅުގައި އޮތް މަސްދޯނިތަކަށް ފުލުހުންނާއި އިމިގްރޭޝަން އަރާ ޗެކްުކުރަނީ
ރާއްޖޭގައި ގަވައިދާ ހިލާފަށް އުޅެ ވިޔަފާރިކުރަމުންދާ ބިދޭސޯން ހޯދުމަށް އިމިގްރޭޝަނުން ހިންގާ އޮޕަރޭޝަންތަކުގައި މިހާތަނަށް ގިނަ އަދަދެއްގެ ބިދޭސީން ވަނީ އަތުލައިގެންފައެވެ. އޭގެތެރޭގައި ކެފޭ ހިންގާ މީހުންނާއި ހަށިވިއްކުމުގައި އުޅޭ މީހުންގެ އިތުރުން ހެދިކާ ހަދާ ވިއްކަމުން ދިޔަ މީހުންވެސް ހިމެނެއެވެ.
ރާއްޖޭގައި ގަވައިދާ ހިލާފަށް އުޅޭ ބިދޭސީން ފޮނުވާލުމަށް ކުރާ މަސައްކަތުގައި މިހާތަނަށް 5000 ވުރެ ގިނަ ބިދޭސީން ފުރުވާލާފައިވާކަމަށް އިމިގްރޭޝަނުން ވަނީ ބުނެފައެވެ. އަދި އެއީ ރެކޯޑެއްކަމަށް އެ އިދާރާއިން ވަނީ ބުނެފައެވެ.
