އުމުރުން 13 އަހަރުގެ އަންހެން ކުއްޖަކަށް ޖިންސީ ގޯނާކުރި މައްސަލައިގައި ހައްޔަރުކުރި ނ. މިލަދޫ / މީޒާން، އަހްމަދު ވިއާމް (27އ) ދޫކޮށްލީ، އޭނާ ބަންދު ކުރި 30 ދުވަހުގެ މުއްދަތު ހަމަވުމުން ކަމަށްވަނީ މައުލޫމާތު ލިބިފައެވެ. އޭނާ ދޫކޮށްލީ އޮކްޓޫބަރު މަހު ކުރީކޮޅުއެވެ. އޭނާ ދޫކޮށްލުމުން ދައުލަތުން އެ މައްސަލަ ހައިކޯޓުގައި އިސްތިއުނާފު ކުރީއެވެ.
ހައިކޯޓުގައި އެ މައްސަލަ ބެލި ތިން ފަނޑިޔާރުންގެ އިއްތިފާގުންވަނީ، ވިއާމް ދޫކޮށްލި ނިންމުން ބާތިލުކޮށްފައެވެ. އަދި އަލުން އެ މައްސަލަ ހަތް ދުވަހުގެ ތެރޭގައި ހުށަހަޅައިފިނަމަ ބަންދާ މެދު އަލުން ގޮތެއް ނިންމުމަށް ހައިކޯޓުގެ ހުކުމުގައި ބުނެފައިވެއެވެ.
ފުލުހުން އެންމެ ފުރަތަމަ ވިއާމް ހައްޔަރު ކުރީ ފިލައިގެން އުޅެނިކޮށެވެ. ވިއާމް ފިލުމަށް އެހީތެރިވެދިން މީހަކުވެސް ހައްޔަރު ކުރިއެވެ. އެ މީހާގެ މައްޗަށްވެސް ދައުލަތުންވަނީ ދައުވާ އުފުލާފައެވެ.
އުމުރުން 13 އަހަރުގެ އަންހެން ކުއްޖަކަށް ޖިންސީ ގޯނާކުރި މައްސަލަ ހިނގީ އުތުރުގެ ރަށެއްގައި އެވެ. މި މައްސަލައިގައި ތުހުމަތު ކުރެވޭ މީހާ ހައްޔަރު ކުރީ އޭނާ ފިލައިގެން އުޅޭތީ، އޭނާ ހޯދުމަށް އޭނާގެ ފޮޓޯއާ ވަނަވަރު އާއްމު ކުރިތާ ކުޑައިރުކޮޅެއްގެ ތެރޭގަ އެވެ.
