ސުޕްރީމް ކޯޓުގައި މިއަދު ބޭއްވި އަޑުއެހުމުގައި ދައުލަތުގެ ވަކީލު އަހުމަދު ޝަފީއު ވިދާޅުވީ ހައި ކޯޓުގެ ނިންމުން ގާނޫނުއަސާސީގެ 143 ވަނަ މާއްދާއާ ހިލާފު ކަމަށެވެ. އެ މާއްދާގައި ބުނަނީ މަތީ މަހަލާގެ ކޯޓުތަކުން ނިންމާ ނިންމުންތަކަށް އެއަށްވުރެ ދަށު މަހަލާގެ ކޯޓުތަކުން ތަބާވާން ޖެހޭނެ ކަމަށެވެ.
ދައުލަތުގެ ވަކީލު ވިދާޅުވީ އާ ހެކި އެއްފަރާތް ކުރަން ހައި ކޯޓުން އެންގިއިރު، އެކަމުގައި ހިނގާފައިވަނީ އިޖުރާއީ މައްސަލައެއް ކަމަށާއި އެއީ އިސްލާހު ކުރެވެން އޮތް ކަމެއް ކަމަށެވެ. އަދި އާ ހެއްކާ ގުޅޭ އިޖުރާއީ ގޯސް އިސްލާހު ކުރާނީ އާ ހެއްކާ ގުޅޭ ގޮތުން ހުށަހެޅުމެއް އޮތް ނަމަ، އެކަމަށް ފުރުސަތުދީ، އެއާ މެދު ބަހުސްކޮށް ހެކި ބަލައިގަތުމާ މެދު ދަށު ކޯޓުގެ ޝަރީއަތުން ގޮތެއް ކަނޑައެޅުން ކަމަށެވެ.
ޔާމީންގެ ވަކީލު ހަމްޒާ ލަތީފް ވިދާޅުވީ ނުބައި މަހަލާއެއްގައި ނުބައި އިޖުރާއަތަކުން ހެކި ހުށަހެޅުމުގެ ނަތީޖާއަކީ ހެކި ބަލައިނުގަތުން ކަމަށެވެ. އަދި މި މައްސަލައިގައި ދައުލަތުން އަމަލުކޮށްފައި އޮތް ގޮތަކީ ހެކިން ދެއްކި ވާހަކަތަކަކަށް ރައްދު ދިނުމުގެ ގޮތުން އާ ހެކި ހުށަހެޅުން ކަމަށް ވިދާޅުވި އެވެ.
