މަޖިލީހުގެ މެންބަރުންގެ މަގާމު ގެއްލޭ މާއްދާއަށް ނުކުތާތަކެއް އިތުރުކުރުމާއެކު ޖުމްލަ ފަސް ބަދަލެއް މަޖިލީހުން މިއަދު ވަނީ ގާނޫނުއަސާސީއަށް ގެނެސްފަ އެވެ.
ސަރުކާރުގެ ފަރާތުން ހުށަހެޅި މި ބިލު މިއަދުން މިއަދަށް ފާސްކޮށް މިހާރު ވަނީ ތަސްދީގު ކުރުމަށް ފަހު ގެޒެޓުކޮށްފަ އެވެ.
މި ކަމާ ގުޅިގެން ދައުލަތުގެ މީޑިއާ ޕީއެސްއެމްއަށް ދެއްވި ހާއްސަ އިންޓަވިއުއެއްގައި އަބްދުއްރަހީމް ވިދާޅުވީ އެ އިސްލާހު ފާސްކުރަން ރައްޔިތުން ގާތުގައި އަހާކަށް ނުޖެހޭނެ ކަމަށެވެ.
ރައްޔިތުން ގާތުގައި އަހައިގެން ކުރަންޖެހޭ ކަންކަން ގާނޫނު އަސާސީގައި ވަރަށް ސާފުކޮށް ބަޔާންކޮށްފައިވާނެކަމަށް އެ މަނިކުފާނު ވިދާޅުވި އެވެ. އޭގެ ތެރޭގައި ހިމެނެނީ ރައްޔިތުންގެ އަސާސީ ހައްގުތަކާ ގުޅިންހުރި ކަންކަމާއި، އިންތިޚާބީ މަގާމުތަކުގެ ދައުރާއި ވެރިކަމުގެ ނިޒާމު ފަދަ ކަންކަން ކަމަށް އަބްދުއްރަހީމް ވިދާޅުވި އެވެ.
އެ މަނިކުފާނު ވިދާޅުވީ ގާނޫނަށް މި އިސްލާހު ގެނައީ، ކޮންމެހެން ވެސް އެކަން ކުރަން ޖެހިގެން ކަމަށާއި މި އިސްލާހުގެ ސަބަބުން ރައްޔިތުން ބާރުވެރިވާނެ ކަމަށެވެ.
ސަރުކާރުގެ ބިލު މަޖިލީހުން ހުށަހެޅީ އެއްވެސް ސިޔާސީ ޕާޓީއެއްގެ އަދި ކަމާބެހޭ އެއްވެސް އިތުރު ފަރާތެއްގެ ހިޔާލެއް ބަހެއް އަދި މަޝްވަރާއެއްވެސް ހޯދުމެއްނެތި އެވެ. މި އިސްލާހުތަކަށް ހިޔާލު ހުށަހެޅުމުގެ ފުރުސަތު ދިނުމަށް ބާ ކައުންސިލުންވެސް މިއަދު ގޮވާލި އެވެ.
ގާނޫނު އަސާސީއަށް މިއަދު އިސްލާހު ގެނައި ގޮތުން ރައްޔިތުންގެ ބާރު ކަނޑުވައިލެވޭ ކަމަށް ވިދާޅުވެ، އެ މައްސަލަ ކޯޓަށް ހުށަޅަން ކުރީގެ ބަންޑާރަ ނައިބު ފާތިމަތު ދިޔާނާ ސައީދު ވަނީ ގޮވައިލައްވައިފަ އެވެ. އަދި ގާނޫނުއަސާސީއަށް މިއަދު ގެނައި ބަދަލު ގާނޫނު އަސާސީއާ ފުށޫއަރާ ކަމަށް ބުނެ، ގާނޫނީ ސައްހަކަމާމެދު ގޮތެއް ނިންމަން ސުޕްރީމް ކޯޓަށް ހުށަހަޅަން މަޖިލީހުގެ ކުރީގެ މެންބަރު ފާރިޝް މައުމޫން ވެސް ވަނީ ގޮވާލައްވައިފަ އެވެ.
