މުއާ ވަނީ އޭނާ ނުކުރާ ކުށެއްގައި ބަންދުކޮށް، އަސާސެއް ނެތް ދައުވާއެއް ކުރި ކަމަށް ބުނެ ގާތްގަނޑަކަށް 5 މިލިއަން ރުފިޔާގެ ބަދަލު ހޯދުމަށް ސިވިލް ކޯޓަށް މައްސަލަ ހުށަހަޅާފަ އެވެ. މި މައްސަލައިގައި މުއާ ދައުވާ ރައްދުކޮށްފައިވަނީ ޕީޖީ އޮފީހާއި މަރުތައް ބެލުމަށް އެކުލަވާލި ރިޔާސީ ކޮމިޝަނާއި އެ ކޮމިޝަނުގެ ތިން މެންބަރުންގެ މައްޗަށެވެ.
ސިވިލް ކޯޓުގެ ގާޒީ އަބްދުﷲ އިހުސާން ކުރެއްވި ހުކުމުގައި ވިދާޅުވީ، ހެޔޮ ނިޔަތެއް ނެތި ތަހުގީގެއް ހިންގައި ދައުވާކޮށްފައިވާ ކަމަށް ބަލާނެ މިންގަނޑެއް ރާއްޖޭގެ ގާނޫނުތަކުގައި ނެތް ކަމަށެވެ. އަދި މުއާއަށް ދައުވާކުރުމުގައި ނުރަނގަޅު ނިޔަތެއް މުއައްސަސާތަކުގެ ތެރޭގައި އޮތްކަން ސާބިތުކޮށްދެވޭ ވަރުގެ ހެއްކެއް ހުށަހަޅާފައި ނުވާ ކަމަށެވެ.
މި މައްސަލައިގެ ފެށުމަކީ ކުރީގެ ރައީސް އިބްރާހިމް މުހައްމަދު ސޯލިހް އެކުލަވާލެއްވި މަރު ކޮމިޝަނުން ތަހުގީގު ކުރަމުން އައި ރިލްވާން ގެއްލުވާލުމާއި ޔާމީން މަރާލުމުގެ މައްސަލައިގައި މުއާ ހިމެނޭހެން ތިން މީހަކު ހައްޔަރުކުރުމެވެ. ނަމަވެސް ތިން މީހުންގެ މައްޗަށް ދައުވާ ސާބިތުނުވާ ކަމަށް ނޮވެމްބަރު 2023 ގައި ކްރިމިނަލް ކޯޓުން ވަނީ ހުކުމްކޮށްފަ އެވެ.
