ރިޔާދުގައި އަލް ގަދްސިއާ އާއި ދެކޮޅަށް ކުޅުނު މެޗުން އަލް ނަސްރު ބަލިވެފައިވަނީ 2-1 ގެ ނަތީޖާއަކުން ނެވެ. މި މެޗުން އަލް ގަދްސިއާ މޮޅުވުމާއެކު އެ ޓީމަށް ވަނީ ލީގުގައި މިހާތަނަށް ކުޅުނު 11 މެޗުން 22 ޕޮއިންޓާއެކު ތާވަލުގެ 5 ވަނަ މަގާމު ލިބިފަ އެވެ.
މި މެޗުން ބަލިވި ނަސްރު އޮތީ ތިންވަނައިގައެވެ. ތިންވަނައިގައި އޮތް އަލް ނަސްރަށް ވެސް ލިބިފައިވަނީ 11 މެޗުން 22 ޕޮއިންޓެވެ. އެ ޓީމަށް ކުރި ލިބިފައިވަނީ ފައިދާ ގޯލުގެ ތަފާތުންނެވެ. ލީގުގެ އެއްވަނައިގައި އޮތް އަލް ހިލާލް އަށް 10 މެޗުން 28 ޕޮއިންޓް ލިބިފައިވާއިރު ދެވަނައިގައި އޮތް އިއްތިހާދަށް 10 މެޗުން ލިބިފައިވަނީ 27 ޕޮއިންޓެވެ.
އަލް ގަދްސިއާ އާއި ދެކޮޅަށް އަލް ނަސްރު ކުޅުނު މި މެޗުގެ 32 ވަނަ މިނިޓުގައި ކްރިސްޓިއާނޯ ރޮނާލްޑޯ ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ. އެހެންނަވެސް އަލް ގަދްސިއާއިން ދެ ލަނޑު ޖަހައި މެޗު އަނބުރާލީއެވެ.
