ލޯބިވެރިޔާގެ ބަރަހަނާ ފޮޓޯތަކެއް ލީކްކުރާނެކަމަށް ބުނެ ބިރުދެއްކި މައްސަލާގައި ހައްޔަރު ކޮށްފައިވަނީ އއ. މަތިވެރި / ފަޒާ އުމުރުން 19 އަހަރުގެ ޒައިދާން މުހައްމަދު އެވެ. އޭނާއަކީ އެރަށު ޕޮލިސް ސްޓޭޝަންގައި މަސައްކަތްކުރާ ރެކްރޫޓު ފުލުހެކެވެ.
ކޯޓު އަމުރެއްގެ ދަށުން ޒައިދާން ހައްޔަރު ކުރުމަށް ފަހު އެންމެ ފުރަތަމަ އޭނާގެ ބަންދާ މެދު ގޮތެއް ނިންމީ އއ. މަތިވެރި މެޖިސްޓްރޭޓް ކޯޓުންނެވެ. އެ މުއްދަތުހަމަ ވެގެން އޭނާގެ ބަންދު އަލުން ކޯޓަށް ގެންގޮސް އިތުރު ކޮށްފައިވާއިރު، އޭނާގެ ފޯނާ އަދި މައްސަލައާ ގުޅޭ ހެކިތައް އޭނާ ނައްތާލާފައިވާ ކަމަށް ފުލުހުން ތުހުމަތު ކުރެއެވެ.
ފުލުހުން ކުރިން ބުނީ އެ ފުލުސް މީހާ އޭނާގެ ލޯބިވެރިޔާއަށް ބިރުދައްކާ ލޯބިވެރިޔާގެ އޮރިޔާން މަންޒަރު ދައްކުވައިދޭ ފޮޓޯ އާއި ވީޑިއޯ ސޯޝަލް މީޑިއާގައި ލީކު ކޮށްލާނެ ކަމަށް ބުނެ ބިރުދައްކާ އިންޒާރުދީ، ބްލެކް މެއިލްކުރި ކަމަށް ތުހުމަތު ކުރެވޭކަމަށެވެ. ފުލުހުން ބުނީ މައްސަލަ އިތުރަށް ތަހުގީގުކުރަމުންދާ ކަމަށެވެ.
މި ފުލުސް މީހާގެ ބަންދު މުއްދަތުން ފަހުން އިތުރުކުރިއިރު، އޭނާއަށް މީހަކު ޖާމިނުވެ، ކަފާލާތުގެ ދަށުން އޭނާ ދޫކޮށްދިނުމަށްވެސް އެދިފައިވެ އެވެ.
