ކުރިން ގައުމީ ޓީމަށްވެސް ކުޅޭ، އަދި ރާއްޖޭގެ އެންމެ ބޮޑު އެންމެ ކާމިޔާބު ކުލަބު ކަމަށްވާ ނިއުގެ ކެޕްޓަންކަންވެސް ކުރި ހޮކޭއަކީ ރ. އަލިފުށްޓަށް އުފަން ކުޅުންތެރިއެކެވެ. ހޮކޭވަނީ އަލިފުށީ ޓީމުގެ ކެޕްޓަންކަމުގެ ގޮތުގައި ރޭ، އަލުން އެނބުރި ގަލޮޅު ދަނޑަށް އައިސް، ގޯލްޑްކަޕުގައި ބ. ކެންދޫ އަތުން ބޮޑު ތަފާތަކުން މޮޅުވެފައެވެ.
އަލިފުށީ ސަޕޯޓަރުންގެ އަޑުން ގަލޮޅު ދަނޑު ގުގުމާލާފައި އޮތް މެޗުން އަލިފުށި މޮޅުވީ ފަސް ލަނޑޫ އެއް ލަނޑުންނެވެ. އަލިފުށީ ޓީމު ބިނާކޮށްފައި އޮތީ ފުރަތަމަ ޑިވިޝަނުގެ ތަޖުރިބާކާރު ކުޅުންތެރިން ގިނަ އަދަދަކަށް ހިމަނައިގެންނެވެ. ކެންދޫގައި ގިނައީ ގަލޮޅު ދަނޑަށް ވެސް މުޅިން އާ ކުޅުންތެރިންނެވެ.
ރޭގެ މެޗުގައި ދަނޑުގެ ލައިޓްތައް ނިވި މެޗުގެ ކުޅުން 20 މިނެއްހާ އިރަށް މެދުކެނޑިގެން ދިޔަ އެވެ. ލައިޓްތައް ދިއްލުމަށް ފުރަތަމަ ކުރި މަސައްކަތުން ބައެއް ލައިޓްތައް ދިއްލުނެވެ. އެކަމަކު އަނެއްކާވެސް ދެވަނަ ފަހަރަށް މުޅި ދަނޑުން ލައިޓްތައް ނިވިގެން ދިޔަ އެވެ.
ގޯލްޑްކަޕުގައި ހޮކޭ، ރަށު ޓީމު ގޮވައިގެން އަލުން ދަނޑަށް ނުކުތްއިރު، ދިވެހި ފުޓްބޯޅައިގެ ގިނަ ލެޖެންޑުންތަކެއްދަނީ މި މުބާރާތުގައި އެކި ގޮތްގޮތުން ފެންނަމުންނެވެ.
