ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީ އެކްސްގައި ކުރެއްވި ޕޯސްޓެއްގައި ވިދާޅުވީ ރަކީދޫ މިހާރު ފެންނާނީ އިޔާދަކުރަނިވި ހަކަތައިން ކުރިއަރާފައިވާ ރަށެއްގެ ގޮތުގައި ކަަމަށެވެ.
އެގޮތުން ރަކީދޫގައި ގާއިމްކުރެވުނު ހައިބްރިޑް ޕީވީ ބެސް ޑީޖީ ސިސްޓަމް މިހާރު މުޅި ރަށަށް ކަރަންޓް ދޭކަމަށާއި ޖަނަރޭޓަރު ހިންގާނީ ދުވާލަކު އެންމެ 2 ގަޑީރަށް ކަމަށް އެމްޑީ ފަހުމީ ވިދާޅުވިއެވެ. އަދި ސޯލާ އަދި ބެޓެރީ ސްޓޯރޭޖް މި ސަސްޓަމް ބޭނުން ކުރާކަމަށްވެސް ފަހުމީ މައުލޫމާތުދެއްވިއެވެ.
އޭގެއިތުރުން އެ ޕޯސްޓްގައި ފަހުމީ ވަނީ ރައީސް ޑރ. މުހައްމަދު މުއިއްޒުގެ 33 ޕަސެންޓް އިއާދަކުރަނިވި ހަކަތަ ހާސިލްކުރުމަށް ދެއްވި ތަސައްވަރާ ވައުދުފުޅަށް ޝުކުރު އަދާކުރައްވާފައެވެ.
ސްޓެލްކޯގެ މީޑިއާ އޮފިޝަލު އަހުމަދު މުހައްމަދު ވިދާޅުވީ މިކަމަކީ ރައީސް ގެ 33 އިންސައްތަ އިޔާދަކުރަނިވި ހަކަތައަށް ވާސިލްވުމަށް ކުރެވޭ މަސައްކަތުގެ ވަރަށް ބޮޑު ކުރިއެރުމެއް ގޮތަށް ފާހަގަ ކުރެވޭކަމަށެވެ. އަދި އިތުރު 5 ރަށެއްވެސް އެގޮތަށް ހައިބްރިޑް ޕީވީ އަށް ބަދަލުކުރުމުގެ ވިސްނުން ސްޓެލްކޯއިން ގެންގުޅޭ ކަަމަށްވެސް އޭނާ ވިދާޅުވިއެވެ.
