ޔުވެންޓަސް އާއި ފްރާންސްގެ ކުރީގެ މިޑްފީލްޑަރު ޕޯލް ޕޮގްބާ ބްލެކްމެއިލް ކުރި ކަމަށް ބުނާ މި މައްސަލައިގައި ހަ މީހެއްގެ މައްޗަށް ޝަރީއަތްވަނީ ފަށާފައެވެ. 2022 ވަނަ އަހަރު ހިނގި ކަމަށް ބުނާ މި ހާދިސާއަކީ ބްލެކްމެއިލްކޮށްގެން ޕޮގްބާ އަތުން ގިނަ އަދަދެއްގެ ފައިސާ ފޭރިގަންނަން އުޅުނު މައްސަލައެކެވެ.
މި މައްސަލައިގެ ޝަރީއަތް ފަށާފައިވާއިރު، ޕޮގްބާގެ އާއިލީ މެންބަރެއްގެ ވަރަށް ގާތް މީހަކާއި ޕޮގްބާގެ ކުޑައިރުގެ ރައްޓެހިން މި މައްސަލައިގައި ހިމެނޭ ކަމަށްވެއެވެ.
ގިނަ މައްސަލަތަކެއްގެ ތެރޭގައި އަބަދުވެސް އުޅޭ ޕޮގްބާގެ މި މައްސަލަ އެންމެ ފުރަތަމަ ސުރުޚީތަކަށް އަރާފައިވަނީ 2022 ވަނަ އަހަރުގެ އޮގަސްޓް މަހުއެވެ. އޭގެ ފަހުން މަނާ ބޭހުގެ މައްސަލައެއް ފެންމަތިވެ ޕޮގްބާ ހުރީ އަދިވެސް ސަސްޕެންޝަނުގައެވެ. ސަސްޕެންޝަން ލުއި ކުރުމުން އަންނަ މާރިޗު ހިސާބުގައި އަލުން ކުޅުމުގެ ހުއްދަ ޕޮގްބާއަށް ލިބޭއިރު، އޭނާގެ ކޮންޓްރެކްޓް ޔުވެންޓަސްއިން މިހާރުވަނީ އުވާލާފައެވެ.
