ބަލިމީހުން އުފުލުމަށާއި ސާޗް އެންޑް ރެސްކިއުއަށް ހާއްސަކޮށް ހެލިކޮޕްޓަރުގެ ހިދުމަތް ދޭން ނިންމާފައި އެކަން ފަށާނެކަން ސަރުކާރުން އިއުލާންކުރީ މިއަހަރުގެ ޖެނުއަރީ މަހު 28 ގައެވެ. ބަލި މީހުން އުފުލުމުގެ އިތުރުން ފަތުރުވެރިކަމުގެ ސިނާއަތުގައި ފަތުރުވެރިން އުފުލުމަށްވެސް މި ހެލިކޮޕްޓަރުތައް ބޭނުންކުރާނެކަމަށް ސަރުކާރުން ވަނީ ބުނެފައެވެ. ހެލިކޮޕްޓަރުގެ ހިދުމަތް ރާއްޖޭގައި ދިނުމަށް ޝައުގުވެރިވާ ބަޔަކު ހޯދުމަށް 36 ފަރާތަކުން ކުރިމަތިލިކަމަށް ޓްރާންސްޕޯޓް މިނިސްޓްރީން މީގެ ކުރިން ވަނީ ބުނެފައެވެ.
ސަރުކާރަށް އަހަރެއްވުމާއި ގުޅިގެން ދައުލަތުގެ މީޑިއާގައި ވާހަކަ ދައްކަވަމުން ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވީ ރާއްޖޭގެ ހެލިކޮޕްޓަރު އޮޕަރޭޓްކުރަން ހޮވުނު ފަރާތާއިއެކު ކުރިޔަށް އޮތް 10 ނޫނީ 15 ދުވަހުގެ ތެރޭގައި ސޮއިކުރާނެކަމަށެވެ. އަދި އަންނަ އަހަރުގެ މާރިޗު މަހުގެތެރޭގައި ރާއްޖޭގައި ހެލިކޮޕްޓަރު އޮޕަރޭޓް ކުރަން ފަށާނެކަމަށްވެސް މިނިސްޓަރު އަމީން ވިދާޅުވިއެވެ.
މި ހިދުމަތް ދިނުމަށް ނިންމާފައިވަނީ، އިނގިރޭސިވިލާތުގެ ސިވިލް އޭވިއޭޝަންގެ އެހީގައި ހަދާ ޓެކްނިކަލް އެސެސްމަންޓްތަކަކަށް ފަހުގައިކަމަށްވެސް މިނިސްޓަރު އަމީން ވަނީ ވިދާޅުވެފައެވެ.
ހެލިކޮޕްޓަރުގެ ހިދުމަތް ދިނުމަށް ސޮއިކުރަނީ 10 އަހަރު ދުވަހުގެ މުއްދަތަކަށެވެ.
1999 ވަނަ އަހަރު ހެލިކޮޕްޓަރު ވެއްޓުމުގެ ދެ ހާދިސާއެއް ރާއްޖޭގައި ހިނގާ ދިވެހިންނާއި ފަތުރުވެރިން ވަނީ މަރުވެފައެވެ. އެއާއި އެކު ރާއްޖޭގައި ހެލިކޮޕްޓަރު ދުއްވުން މަނާކޮށް ހުއްޓާލިއެވެ.
