މިއަދު ޕެންޝަން އޮފީހާއެކު ވެވުނު އެއްބަސްވުމަކީ ދައުލަތުގެ އެކި އިދާރާތަކުން އިސްރަށްވެހިންނަށް ފޯރުކޮށްދޭ ހިދުމަތްތައް ހަރުދަނާކުރުމަށް ކުރަމުންދާ މަސައްކަތުގެ ތެރެއިން ކުރެވުނު މުހިއްމި ކަމެއްކަމަށް ސޯޝަލް އެންޑް ފެމިލީ ޑިވެލޮޕްމަންޓް މިިނިސްޓްރީން ފާހަގަކުރެ އެވެ.
މި އެއްބަސްވުމުގެ ދަށުން، ޕެންޝަން އޮފީހުން ތައްޔާރުކޮށްފައިވާ ހާއްސަ ޕޯޓަލްއެއް މެދުވެރިކޮށް އިސްރަށްވެހިންގެ ރަޖިސްޓްރީ ތައްޔާރުކުރުމަށް ބޭނުންވާ މައުލޫމާތު އެއްކޮށް އެމައުލޫމާތު ރައްކާތެރިކަމާއެކު ބެލެހެއްޓުމަށް ބޭނުންވާ ފަންނީ އެހީތެރިކަން ޕެންޝަން އޮފީހުން މިނިސްޓްރީއަށް ފޯރުކޮށްދިނުމަށް ހަމަޖެހިފައިވާކަމަށް އެ މިނިސްޓްރީްނ ބުނެ އެވެ.
މި އެއްބަސްވުމުގައި ޕެންޝަން އޮފީހުގެ ފަރާތުން ސޮއިކުރައްވާފައިވަނީ ޗީފް އެގްޒެކެޓިވް އޮފިސަރު، ސުޖާތާ ހަލީމްއެވެ. އަދި މިނިސްޓްރީ އޮފް ސޯޝަލް އެންޑް ފެމިލީ ޑިވެލޮޕްމަންޓްގެ ފަރާތުން ސޮއިކުރައްވާފައިވަނީ ސްޓޭޓް މިނިސްޓަރު، އިބްރާހީމް އިސްމާއިލް އަލީ އެވެ.
ނިމިދިޔަ ސެޕްޓެމްބަރު މަހު ރާއްޖެއިން ވަނީ އިސްރަށްވެހިންގެ ދުޅަހެޔޮކަމަށް އަމާޒުކޮށްގެން ޔޫއެންއެފްޕީއޭއާއެކު މަސައްކަތްކުރުމަށް ނިންމާފައެވެ. އެގޮތުން މި މަސައްކަތް ކުރަން ނިންމާފައިވަނީ ޖެންޑާ މިނިސްޓަރު ޑރ. އައިޝަތު ޝިހާމް އިންޑޮނޭޝިޔާއަށް ކުރެއްވި ދަތުރުފުޅެއްގަ އެވެ. މި ދަތުރުފުޅުގައި މިނިސްޓަރު ވަނީ ޔޫއެންއެފްޕީއޭގެ އިސް ވެރިންނާ ބައްދަލުކުރައްވައި، ދެ ފަރާތުން ގުޅިގެން ކުރެވިދާނެ މަސައްކަތްތަކާ ގުޅޭގޮތުން މަޝްވަރާކުރައްވާފަ އެވެ.
