އެމްޑީޕީން ބުނީ "ޤާނޫނު އަސާސީގެ ދިފާއުގައި ރައްޔިތުން"ގެ ނަމުގައި ބާއްވާ މި ޖަލްސާ އޮންނާނީ އަންނަ މަހުގެ 10 ވަނަ ދުވަހުގެ ރޭ ކަމަށެވެ. ޖަލްސާ އޮންނާނީ ކާނިވާ ސަރަހައްދުގައިކަމަށް އެޕާޓީން ބުނެއެވެ.
އެމްޑީޕީން މި ޖަލްސާ ބާއްވަން ނިންމާފައިވަނީ އިންސާނީ ހައްގުތަކުގެ ދުވަހުގެ ގޮތުގައި ފާހަގަކުރާ ދުވަހާއި ގުޅުވައެވެ.
އެމްޑީޕީން ބުނީ މި ޖަލްސާ ބާއްވަނީ، ގިނަ ބައެއްގެ މަސައްކަތުން ހޯދި ޑިމޮކްރަސީ އާއި އިންސާނީ ހައްގުތައް މި ސަރުކާރުން ނިގުޅައިގަންނަމުން ދާތީ އެކަމާ ދެކޮޅަށް އަޑުއުފުލުމުގެ ގޮތުންކަމަށެވެ.
މި ޖަލްސާގައި ވީހާ ވެސް ގިނަ ރައްޔިތުން ބައިވެރިވުމަށް އެމްޑީޕީން ވަނީ ދައުވަތު ދީފައެވެ.
" ފުދިއްޖެ - ފުޑިއްޖެ" މި ނަމުގައި މިމަހުގެ 12 ވަނަދުވަހުވެސް އެމްޑީޕީން ވަނީ ޖަލްސާއެއް ބާއްވާފައެވެ. ދެ އިންތިހާބުން ލިބުނު ބޮޑު ނަކާމިޔާބީއަށް ފަހު އެމްޑީޕީން ހަރުގެއިން ބޭރުގައި ބޭއްވި އެ އެއްވުމުގައި ގިނަ ބަޔަކު ވަނީ ބައިވެރިވެފައެވެ.
