ނިއު ރޭޑިއަންޓް ސްޕޯޓްސް ކްލަބްގެ މެނޭޖްމަންޓްގައި ސިޔާސީ ގޮތުން ތަފާތު އެކި ފިކުރުގެ މީހުން މިހާރު އެބަތތިއްބެވެ. ދާދި ފަހުން އާ ޗެއާމަންކަމަށް އިންތިހާބުވީ މުބީންއަކީވެސް ސިޔާސީ މީހެކެވެ. އެކަމަކު މުބީން ވިދާޅުވީ ބޯޑުގައި ސިޔާސީ އެކި ފިކުރުގެ މީހުން ހިމެނޭ ކަމަށާއި އެ ކްލަބްގައި ކުރަނީ ތަފާތު މަސައްކަތަކަށްވާއިރު، އެކަން ސިޔާސީ ކަމަކާ ނުގުޅުވުމަށް އެދޭ ކަމަށެވެ.
ރީޖަނަލް އެއާޕޯޓްސް ކޮމްޕެނީގެ މެނޭޖިން ޑިރެކްޓަރުގެ މަގާމު ވެސް ފުރުއްވަމުން އަންނަ މުބީން ވިދާޅުވީ އޭނާ ފަހަރެއްގައި ސިޔާސީ ޕޯޑިއަމްތަކުން ފެނިފައި ހުރެދާނެ ކަމަށާއި އެކަމަކު ނިއުގެ މަސައްކަތަކީ ތަފާތު މަސައްކަތެއް ކަމަށެވެ.
މުބީންގެ އިތުރުން، ދެން ނިއުގެ އިސް މަގާމުތަކުގައި މަސައްކަތްކުރަން އިންތިހާބުވީ، ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު އަލީ އިބްރާހީމް (ކައްޕި) އާއި ވެމްކޯގެ މެނޭޖިން ޑިރެކްޓަރު މުޖުތަބާ ޖަލީލް (މުޖޭ) އެވެ.
