ސައުދީގެ ބިޑް އިވެލުއޭޝަން ރިޕޯޓް އާއްމުކޮށްފައިވާއިރު، މި އިވެލުއޭޝަނަށް މަތިން މާކްސް ލިބިފައިވެއެވެ. އެވްރެޖްކޮށް 5 އިން 4.2 ސްކޯ މި އިވެލުއޭޝަންގައި ލިބިފައިވާއިރު ރިޕޯޓްތައް ބުނާ ގޮތުމް މިއީ މިހާތަނަށް ލިބުނު އެންމެ މަތީ ސްކޯ އެވެ.
އަންނަ މަހު ރަސްމީކޮށް، ސައުދީއިން ބިޑް ކާމިޔާބުކުރިކަން އިއުލާންކޮށް، ވޯލްޑްކަޕް ހޯސްޓުކުރުމުގެ ފުރުސަތު އެ ގައުމަށް ދޭނެ ކަމަށް ބެލެވެއެވެ. މިހާރު ތާވަލުކޮށްފައި އޮތީ ޑިސެމްބަރު މަހުގެ 11 ވަނަ ދުވަހު ރަސްމީކޮށް އެކަން އިއުލާން ކުރާށެވެ.
ސައުދީ އަރަބިއްޔާއިން 2034 ވަނަ އަހަރުގެ ވޯލްޑް ކަޕް ބާއްވަން ކުރާ މަސައްކަތުގެ ތެރެއިން 11 ދަނޑު އެޅުމުގެ ޕްލޭންވަނީ ހަދާފައެވެ. ސައުދީން ޕްލޭންކޮށްފައިވާ އާ 11 ދަނޑުގެ ތެރެއިން އަށް ސްޓޭޑިއަމް ހުންނާނީ ވެރިރަށް ރިޔާޒުގައެވެ. އޭގެ ތެރޭގައި 92،760 މީހުންގެ ޖާގައިގެ ކިންގް ސަލްމާން އިންޓަނޭޝަނަލް ސްޓޭޑިއަމް ހިމެނޭއިރު، އެ ދަނޑުގައި ވޯލްޑްކަޕް ހުޅުވާ މެޗާއި ފައިނަލް ކުޅޭނެ އެވެ.
