ސައުދުﷲ މަޖިލީހަށް ފޮނުވި ސިޓީގައި ވިދާޅުވެފައިވަނީ ތިނަދޫއަށް 2023 ގައި ސިޓީގެ ދަރަޖަ ދީފައިވަނީ ލާމަރުކަޒީ ގާނޫނާ ހިލާފަށް ކަމަށެވެ. އަދި 2022 އިން ފެށިގެން ތިނަދޫ ކައުންސިލުން އެ ރަށުގެ އާބާދީއާ ގުޅޭ ތަފާސްހިސާބުތައް އޮޅުވާލާފައިވާ ކަމަށް އޭނާ ވަނީ ތުހުމަތުކޮށްފަ އެވެ.
ސައުދުﷲ ގެ ސިޓީގައި ވިދާޅުވެފައިވާ ގޮތުގައި ތިނަދޫގެ އަސްލު އާބާދީ 8،000 އަށް ވެސް ނާރާ ކަމަށް އެލްޖީއޭ އަދި ޑީއެންއާރަށް އެނގިފައިވެ އެވެ. އަދި އެ ރަށުގެ ރަޖިސްޓްރީގައި އެހެން ރަށްރަށުގެ މީހުންގެ ނަން ހިމަނައި، ތަކުރާރުކޮށް އެކެއްގެ ނަން ޖަހައި، މަރުވެފައިވާ މީހުން ދިރިތިބި މީހުންގެ ގޮތުގައި ހިމަނާފައިވާ ކަމަށް ވެސް އޭނާ ވަނީ ތުހުމަތުކުރައްވާފައެވެ.
މި މައްސަލަ މަޖިލީހަށް ހުށަހެޅުމުގެ ކުރިން، ތިނަދޫގެ ސިޓީގެ ދަރަޖަ ބާތިލުކުރަން އެދި ހައި ކޯޓަށް ދުސްތޫރީ މައްސަލައެއް ހުށަހަޅާފައިވެ އެވެ. އެ މައްސަލަ ހުށަހެޅީ ގާނޫނީ ވަކީލު އަދި ތިމާވެއްޓާ ބެހޭ މިނިސްޓްރީގެ ކުރީގެ ޑެޕިއުޓީ މިނިސްޓަރު މުހައްމަދު ރާގިބު އަހުމަދެވެ.
- ތިނަދޫގެ އަސްލު އާބާދީ 8،000 އަށް ވެސް ނާރާކަމަށް ބުނެފައިވޭ
- މި މައްސަލަ ހައި ކޯޓަށް ވެސް ހުށަހަޅާފައިވޭ
- މައްސަލަ ހުށަހެޅުމަށްފަހު ރާގިބު ވަނީ މަގާމުން ވަކިކޮށްފަ
- ސިޓީގެ ދަރަޖަ ދިނީ ލާމަރުކަޒީ ގާނޫނާ ހިލާފަށް ކަމަށް ތުހުމަތުކުރޭ
