ޑރ. އައިޝަތު ރަމީލާ މިއަދު މިނިސްޓަރުކަމުން އިސްތިއުފާދެއްވީ ސިއްހީ ހާލުކޮޅު ހުރިގޮތުން ކަމަށް ރައީސް އޮފީހުން ވަނީ ބުނެފައެވެ.
ޑރ. އައިޝަތު ރަމީލާ ގެންދަވަނީ ކެންސަރުގެ ބާވަތެއްކަމަށްވާ މެޓަސްޓޭޓިކް ސީރަސް ޕެޕިލަރީ ކާސިނޯމާއަށް ފަރުވާ ހޯއްދަވަމުންނެވެ. މެޓަސްޓޭޓިކް ކެންސަރަކީ ހަށިގަނޑުގެ އެއް ގުނަވަނުން އަނެއް ގުނަވަނަށް ފެތުރޭ ކެންސަރަކެވެ.
ފަހު ސްޓޭޖުގައި ކެންސަރު ބަލި ހުރިކަން އެނގުމާއެކު މަގާމާއި ހަވާލުވުމަށްފަހު ދެ ފަހަރެއްގެ މަތިން ޑރ. ރަމީލާ ވަނީ ފަރުވާއަށް ރާއްޖެއިން ބޭރަށް ވަޑައިގެންފައެވެ.
ރަމީލާ އިސްތިއުފާދެއްވުމުން އެ މިނިސްޓްރީ ހިންގެވުން ވަގުތީ ގޮތުގައި ރައީސް ޑރ. މުހައްމަދު މުއިއްޒު މިއަދު ވަނީ މިނިސްޓަރު އޮފް ހަޔާ އެޑިޔުކޭޝަން، ލޭބާ އެންޑް ސްކިލްސް ޑިވެލޮޕްމަންޓް، ޑރ. މަރްޔަމް މާރިޔާއާ ހަވާލު ކުރައްވާފައެވެ.
ޑރ. ރަމީލާގެ އިސްތިއުފާ ގަބޫލު ކުރައްވާ ރައީސް ޑރ. މުއިއްޒު ނެރުއްވި ބަޔާނުގައިވަނި ޑރ އާއިޝަތު ރަމީލާ، އަލާސްކަންފުޅުގައި އުޅުއްވަމުންވެސް، މިނިސްޓަރުގެ ހައިސިއްޔަތުން، ދިވެހިރާއްޖޭގެ ޤާނޫނީ ވެރިކަން ކުރިއަރުވައި، އެންމެހައި ރައްޔިތުންނަށް ލާބައާއި ފާގަތިކަން ހޯދައިދެނިވިމަގުން، މި ދައުލަތުގެ ކަންތައްތައް ރަނގަޅަށް ހިންގުމުގައި އެހީތެރިވުމަށް ދެއްވި އެއްބާރުލެއްވުމަށާއި، ތެދުވެރިކަމާއި ވިސްނުންތެރިކަމާއެކު، ސަރުކާރަށް ކޮށްދެއްވި އަގުހުރި ޚިދުމަތްތަކަށްޓަކައި ޝުކުރު އަދާކުރައްވާފައެވެ.
އަދި ޑރ ރަމީލާ ފަދަ ހީވާގި އަމާނާތްތެރި ޤާބިލު ބޭފުޅަކު ވަޒީރުންގެ މަޖިލީހުގައި ހިމެނުމަކީ ލިބުނު ވަރަށް ބޮޑު އުފަލެެއްކަމަށްވެސް މުއިއްޒު ވިދާޅުވިއެވެ.
