ބީބީސީން ރިޕޯޓްކޮށްފައިވާ ގޮތުގައި ގިނީގެ ދެވަނައަށް އެންމެ ބޮޑު ސިޓީ ކަމަށްވާ ންޒެރެކޯރޭގައި ބޭއްވި ފުޓްބޯޅަ މެޗެއްގައި މީހުންތައް ދަނޑަށް އަރައި ހިނގި ހަމަ ނުޖެހުންތަކުގައި 56 މީހުން މަރުވެފައިވާ ކަމަށް އެ ގައުމުގެ ސަރުކާރުންވަނީ ބުނެފައެވެ.
ރިޕޯޓްތައް ބުނާ ގޮތުގައި ހާދިސާ ހިނގަށް މެދުވެރިވީ ރެފްރީގެ ނިންމުމަކާ ގުޅިގެންނެވެ. މި މެޗުގައި ވިޒިޓިން ޓީމުގެ ދެ ކުޅުންތެރިއަކަށް ރެފްރީ ދެއްކި ރަތް ކާޑާ އަދި ދިން ޕެނަލްޓީއަކާ ގުޅިގެން މި ހާދިސާ ހިނގަން މެދުވެރިވީ ކަމަށް ރިޕޯޓްތައް ބުނެއެވެ.
ލޯކަލް މީޑިއާތަކުން ބުނި ގޮތުގައި ދަނޑުގެ ހަމަ ނުޖެހުން ކޮންޓްރޯލް ކުރުމަށް ފުލުހުން ކަރުނަގޭސް ބޭނުންކޮށްފައިވެއެވެ.
ގިނީގެ ސަރުކާރުން މިހާރުވަނީ މި ހާދިސާއާ ގުޅިގެން ޒިންމާވާން ޖެހޭ މީހުން ހޯދުމަށް ހާއްސަ އިންކުއަރީއެއް ފަށާފައެވެ.
މި ހާދިސާއާ ގުޅިގެން ގިނަ ބަޔަކު ހޮސްޕިޓަލަށް މިހާރުވެސް ގެންގޮސް ފަރުވާ ދެވެމުން އަންނަ އިރު މަރުވި މީހުންގެ އަދަދު އިތުރުވުމަކީ އެކަށީގެންވާ ކަމެކެވެ. ނަން ހާމަކުރަން ބޭނުން ނުވާ އެއް ޑޮކްޓަރަކު ހޮސްޕިޓަލުގައި ހުރެ، އޭއެފްޕީގެ ނޫސް އެޖެންސީއަށް ބުނީ މުޅި ހޮސްޕިޓަލް އޮތީ މަރުވެފައިވާ މީހުންގެ ހަށިތަކުން ފުރިފައެވެ.
އާދީއްތަ ދުވަހުގެ މި މެޗަކީ 2021 ވަނަ އަހަރުގެ ސެޕްޓެމްބަރު މަހު ބަޣާވާތަކުން ވެރިކަން އަތުލައިގަތް ރައީސް މަމަޑީ ޑައުމްބޫޔާގެ ޝަރަފުގައި ބޭއްވި މުބާރާތެއްގެ ބައެކެވެ. އިދިކޮޅު ފަރާތްތަކުން ބުނާ ގޮތުގައި މި މެޗުތަކަކީ ރިޔާސީ އިންތިޚާބަށް ކުރިމަތިލުމުގެ ކުރިން ޖަންޓާ ލީޑަރަށް ތާއީދު ހޯދުމަށް ކުރާ ފުޅާ ކެމްޕޭނެއްގެ ބައެކެވެ.
މި ހާދިސާއާ ގުޅިގެން ފުޓްބޯޅައިގެ މައި އިދާރާ ފީފާއިން އަދި އެއްޗެއް ނުބުނެއެވެ.
