މަޖިލީހުގެ މިއަދުގެ ޖަލްސާގައި ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް ކުރެއްވި ސުވާލަކަށް ޖަވާބު ދެއްވަމުން މިނިސްޓަރު ވިދާޅުވީ، މިއަހަރުގެ ޖޫން މަހު ޕަބްލިކް އެކައުންޓްސް ރިކޮންސިއުލޭޝަން ކުރުމުގެ މަސައްކަތުގައި މައްސަލަތަކެއް ފާހަގަކުރެވުނު ކަމަށެވެ.
ލޯނު ފަންޑުތަކުން ކުރެވޭ ހަރަދުތައް އެކައުންޓިން ސިސްޓަމުގައި ރިކޯޑުކުރުމުގައި ގެންގުޅުނު އުސޫލުތަކުގައި ހުރި މައްސަލަތަކުގެ ސަބަބުން ކުރީގެ އަހަރުތަކުގެ ހަރަދުތައް މިއަހަރުގެ ބަޖެޓުގައި ރިކޯޑުކުރެވިފައިވާ ކަމަށް މިނިސްޓަރު ވިދާޅުވި އެވެ.
މި މައްސަލައިގައި އޮޑިޓާ ޖެނެރަލްގެ ލަފާ ހޯދުމަށްފަހު، އެ ލަފާގެ މަތިން އާ އުސޫލުތަކެއް ކަނޑައަޅައި، އެ އުސޫލުތަކަށް މިހާރު ވަނީ ބަދަލުކޮށްފައި ކަމަށް މިނިސްޓަރު ވިދާޅުވި އެވެ. އަދި މީގެ ފަހުން މިނިސްޓްރީން އާންމުކުރާ އެއްވެސް ތަފާސްހިސާބެއް ގަވާއިދުން ނުނެރެ ނުހުންނާނެ ކަމަށް މިނިސްޓަރު ވިދާޅުވި އެވެ.
