މި އިސްލާހުތަކަކީ ތަންފީޒީ އިދާރާތަކަށް އިތުރު ބާރުތަކެއް ދިނުމަށް ހުށަހަޅާފައިވާ އިސްލާހުތަކެއް ކަމަށް ފުނަދޫ ދާއިރާގެ މެންބަރު މުހައްމަދު މަމްދޫހު ވިދާޅުވެއެވެ.
މަޖިލީހުގެ މިއަދުގެ ޖަލްސާގައި ވާހަކަފުޅު ދައްކަވަމުން މަމްދޫހު ވިދާޅުވީ މި އިސްލާހުތަކާ އެކު މަސްތުވާތަކެތީގެ މައްސަލަ ހައްލުކުރުމަށް ވަށާޖެހޭ މަސައްކަތްތަކެއް ކުރެވޭނެ ކަމަށެވެ. އަދި މީގެ ކުރިން ގާނޫނު އޮތް ގޮތުން މަސްތުވާތަކެތީގެ ވިޔަފާރީގައި އުޅޭ މީހުންނަށް ކޮންމެވެސް ވަރެއްގެ ހިމާޔަތެއް ލިބޭ ކަމަށް ވެސް އޭނާ ވިދާޅުވި އެވެ.
ޑަބްލިއުއެޗްއޯގެ ރިޕޯޓެއްގައި ވާގޮތުން 2019 އިން 2021 އަށް ރާއްޖޭގައި މަސްތުވާތަކެތި ވިއްކުން ވަނީ 47 ޕަސަންޓު އިތުރުވެފަ އެވެ. އަދި ރާއްޖެއަށް އެތެރެކުރާ މަސްތުވާތަކެތި 30 ޕަސަންޓު އިތުރުވެފައިވާ ކަމަށް މަމްދޫހު ވިދާޅުވި އެވެ.
މަމްދޫހު ވިދާޅުވީ ރައީސް މުހައްމަދު މުއިއްޒުގެ ސަރުކާރުން މި މައްސަލަ ހައްލުކުރުމަށް އިހުލާސްތެރި މަސައްކަތްތަކެއް ކުރަމުންދާ ކަމަށެވެ. އަދި ކުރިއަށް އޮތް އަހަރުތަކުގައި މި ވަބާއިން އަންނަން އޮތް ޖީލުތައް ސަލާމަތްކުރެވޭނެ ކަމުގެ ޔަގީންކަން އެބައޮތް ކަމަށް ވެސް އޭނާ ވިދާޅުވި އެވެ.
