ޓްރާންސްޕޯޓް އެންޑް ސިވިލްއޭވިއޭޝަން މިނިސްޓްރީން ބުނީ މާލެ – ތިލަފުށި ލިންކް މަޝްރޫއުގެ މަސައްކަތުގެ ތެރެއިން ގުޅިފަޅު - ތިލަފުށި ދެމެދު ކަނޑުގައި ތަނބުތައް ޖެހުމުގެ މަސައްކަތް މިމަހުގެ 05 ގައި ފެށުމަށް ހަމަޖެހިފައިވާކަން ކޮންސްޓްރަކްޝަން މިނިސްޓްރީން އަންގާފައިވާކަމަށެވެ.
ގުޅިފަޅު–ތިލަފުށި ޗެނަލް އަންނަ ބުރާސްފަތި ދުވަހުން ފެށިގެން ބަންދުވާނެކަަމަށް ޓްރާންސްޕޯޓް މިނިސްޓްރީން ބުނެއެވެ. އެހެންކަމުން ކަނޑު އުޅަނދުފަހަރު އެސަރަހައްދުން ދަތުރު ނުކުރުމަށް އެ މިނިސްޓްރީން ވަނީ އަންގާފައެވެ.
މީގެ އިތުރުން މާލެ - ވިލިމާލެ އަދި ވިލިމާލެ - ގުޅިފަޅު މި ޗެނަލްތައްވެސް ބަންދު ކޮށްފައިވާތީ އެސަރައްދުން ދަތުރު ނުކުރުމަށްވެސް މިނިސްޓްރީން ވަނީ އަންގާފައެވެ.
ތިލަމާލެ ބްރިޖު އަޅަން ވިލިމާލެ ފަޅުތެރޭގައި ޖަހާފައިވާ ތަނބެއް.-- ފޮޓޯ: ފޮޓޯ: މުހައްމަދު ނާޝިދު
ކަނޑު ގަދަކަމުން ތިލަމާލެ ބްރިޖު އެޅުމުގެ މަސައްކަތް ލަސްވި ނަމަވެސް ބުރިޖުގެ 45.82 ޕަސަންޓު މިހާރު ނިމިފައިވާކަމަށް ދާދި ފަހުން ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް ވަނީ ވިދާޅުވެފައެވެ.
ކޮންސްޓްރަކްޝަން މިނިސްޓްރީން ކުރިން ބުނެފައިވަނީ 2026ގެ ސެޕްޓެމްބަރުގެ ނިޔަލަށް ބްރިޖްގެ މަސައްކަތް ނިންމާލެވޭނެ ކަމަށެވެ.
ތިލަމާލެ ބްރިޖުގެ މަޝްރޫއަކީ އިންޑިއާގެ އެގްޒިމް ބޭންކުގެ ލޯނަކުން ހިންގާ މަޝްރޫއެކެވެ. އެ މަސައްކަތް ކުރިއަށް ގެންދަނީ އިންޑިއާގެ އެފްކޮންސް ކުންފުނިންނެވެ.
މި މަޝްރޫއުގެ އަގަކީ 500 މިލިއަން ޑޮލަރު (6.2 ބިލިއަން ރުފިޔާ) އެވެ. އޭގެ ތެރެއިން 100 މިލިއަން ޑޮލަރު (1.55 ބިލިއަން ރުފިޔާ) އަކީ އިންޑިއާގެ ހިލޭ އެހީއެވެ.
ބްރިޖުގެ މަސައްކަތުގައި ތުރުކީ، ޖަރުމަން އަދި އޮސްޓްރޭލިޔާގެ މާހިރުން ވެސް ބައިވެރިވެއެވެ. މި މަޝްރޫއުއަށް ލޯނު ދިނީ އިންޑިއާގެ އެގްޒިމް ބޭންކުންނެވެ.
