ބައިނަލްއަގްވާމީ ފެންވަރުގެ މުބާރާތްތައް ބޭއްވޭނެ ފެންވަރުގެ ސްވިމިން ޕޫލެއް އެޅުމުގެ މަސައްކަތް މިދިޔަ ދެ ސަރުކާރުން ވެސް ފެށި އެވެ.
މިދިޔަ ދެ ސަރުކާރުން އެ މަސައްކަތް ފެށި ނަމަވެސް އެކަމުގެ އަމަލީ މަސައްކަތާ ހަމައަށް ނުދެވި ކޮންމެ ފަހަރަކުވެސް މަސައްކަތް އޮތީ މަޑު ޖެހިފަ އެވެ. އަދި ރައީސް ޑރ.މުހައްމަދު މުއިއްޒުގެ ސަރުކާރުން ވަނީ އެއް އަހަރުގެ ތެރޭގައި ހުރިހާ ލިޔެކިޔުންތަކެއްގެ މަސައްކަތް ނިންމާ، ޕޫލް އެޅުމުގެ އަމަލީ މަސައްކަތްވެސް ފަށާފަ އެވެ.
ޕޫލް އެޅުމުގެ އަމަލީ މަސައްކަތް މިހާރު ފަށާފައިވާ ކަމަށް ފާހަގަކޮށް ސްޕޯޓްސް މިނިސްޓްރީން ބުނީ އެ މަސައްކަތް ވަރަށް ބާރަށް ކުރިއަށް ދާކަމަށެވެ. އަދި ސްވިމިން އެސޯސިއޭޝަންގެ ބެލުމުގެ ދަށުން ކުރިއަށްދާ މި މަސައްކަތާ ގުޅޭގޮތުން މިނިސްޓަރު ރާފިއު ވިދާޅުވީ އަންނަ އަހަރުގެ ތެރޭގައި މަސައްކަތް އެއްކޮށް ނިންމާލެވޭނެކަމަށެވެ.
ރާފިއު ވިދާޅުވީ އޮލިމްޕިކް ސައިޒު ސްވިމިން ޕޫލް އެޅުމުގެ މަސައްކަތަކީ ކުރިއަށް ނުގޮސް ހުއްޓިފައި އޮތް މަސައްކަތެއްކަމަށާއި، މި ސަރުކާރުން މިކަން އަވަހަށް ފެށޭނެ ގޮތް ހެދުމަކީ ކުޅިވަރަށް ސަރުކާރުން ދެއްވާ އަހަމިއްޔަތު ފެންނަ ކަމެއްކަމަށެވެ.
ދާދި ފަހުން ސްޕޯޓްސް މިނިސްޓްރީން ވަނީ ކުޅިވަރުގެ 20 އަހަރު ދުވަހުގެ މާސްޓާ ޕްލޭނުގައި ހިމެނޭ ބައިތައް އިއުލާންކޮށްފައެވެ.
ކުޅިވަރުގެ ދިގު ރާސްތާ ޕްލޭނުގެ ބައިތައް ތަންފީޒުކުރުމަށް މުޅި ރާއްޖެވަނީ މައިގަނޑު ތިން ސަރަހައްދަކަށް ބަހާލާފައެވެ. އެއީ ދެކުނާއި، މެދު ރާއްޖެ އަދި އުތުރެވެ. 20 އަހަރުގެ މާސްޓާ ޕްލޭން ތަންފީޒުކުރާނީ ހަތަރު ފިޔަވައްސަކަށް އަކަށް ބަހާލައިގެންނެވެ.
