ޝާޝާ ވޯޓާވޯލްޑް މޯލްޑިވްސް ޕްރައިވެޓް ލިމިޓެޑްގެ "އެލެކްސް-1" ލޯންޗު މަރާމާތު ކުރުމަށް ދަރަވަންދޫގެ އަނާ ގޭގެ މުހައްމަދު ބަޝީރާ ހަވާލުކުރީ 2014 ވަނަ އަހަރުގެ ޑިސެމްބަރު 28 ގައެވެ. އޭގެ ފަހުން އެ ލޯންޗު ދިރިމާގޭ މުހައްމަދު އިދުރީސްގެ ގޯއްޗަކަށް އެހެލުމަށްފަހު ވެރިފަރާތަށް އަނބުރާ ރައްދު ނުކުރުމުން، ޝާޝާ ވޯޓާވޯލްޑުން ވަނީ އެ ދެ މީހުންނާއި ކަޅިހި ކާޕެންޓްރީގެ މައްޗަށް ދައުވާ ކޮށްފަ އެވެ.
ފަނޑިޔާރު މަރްޔަމް ރަސާ ރާފިއު އިއްވެވި ހުކުމުގައި، ލޯންޗަށް ލިބުނު ގެއްލުމުގެ ބަދަލު ނަގައިދެވޭނެ ޝަރުއީ އަދި ގާނޫނީ އަސާސެއް ނެތް ކަމަށް ކަނޑައެޅި އެވެ. އެއީ ޝާޝާ ވޯޓާވޯލްޑުން ގެއްލުން ކުޑަކުރުމަށް އެކަށީގެންވާ މަސައްކަތްތަކެއް ނުކުރާތީ އެވެ.
ނަމަވެސް އެ ލޯންޗަކީ ޝާޝާ ވޯޓާވޯލްޑްގެ މުދަލެއްކަން ސާބިތުވާތީ، ޑިސެމްބަރު 2 އިން ފެށިގެން ހަތް ދުވަހުގެ ތެރޭގައި އަނބުރާ އެ ކުންފުންޏާ ހަވާލުކުރުމަށް ކޯޓުން އަމުރުކޮށްފައިވެ އެވެ.
