ރާއްޖޭގެ ހުރިހާ ސިޓީތަކާއި ރަށްތަކުގައި "ޓޮބޭކޯ ސިޒޭޝަން ކްލިނިކް" ސިނގިރޭޓާ ދުރުކޮށްދޭ ކްލިނިކްތައް ޤާއިމުކުރުމަށް ރައީސް ޑރ. މުހައްމަދު މުއިއްޒު ވަނި ނިންމާފައެވެ.
މިކަމާއި ގުޅިގެން މި މަސައްކަތް ކުރިޔަށްދާ ގޮތް ހާމަކުރަން ހެލްތް މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމެެއްގައި ހެލްތް މިނިސްޓަރު އަބްދުﷲ ނާޒިމް ވިދާޅުވީ ދުންފަތުން ދުރަށްދާން ބޭނުންވާ މީހުން ފަރުވާ ހޯދުމަށް އެ މިނިސްޓްރީން މިހާރު ނަމްބަރެއް ތައާރަފުކޮށްފައިވާކަމަށެވެ.
މިގޮތުން ކުއިޓް ލައިންގެ ގޮތުގައި ތައާރަފުކޮށްފައިވާ ނަމްބަރު 1671 މި ހިދުމަތް އަންނަ އާދިއްތަދުވަހުން ފެށިގެން އެޗްޕީއޭ މެދުވެރިކޮށް ލިބެމުންދާނެކަން މިނިސްޓަރު ނާޒިމް ފާހަގަކުރެއްވިއެވެ.
މިނިސްޓަރު ނާޒިމް ވިދާޅުވީ ދުންފަތުން ދުރުވާ ބޭނުންވާ މީހުންނަށް ބޭނުންވާ ތަކެތި އާސަންދަ މެދުވެރިކޮށް ލިބޭނެ އިންތިޒާމުތައް ހަމަޖެއްސުމުގެ މަސައްކަތް މިހާރު ކުރަމުން އަންނަކަމަށެވެ.
ދުންފަތުގެ އިސްތިޢުމާލުކުރުން ހުއްޓާލަން ބޭނުންވާ ފަރާތްތަކަށް ބޭނުންވާ ބޭސް، އެސް.ޓީ.އޯ މެދުވެރިކޮށް ރާއްޖޭގެ ހުރިހާ ސިޓީތަކާއި އަތޮޅު ހޮސްޕިޓަލް ގާއިމުކޮށްފައިވާ ރަށްތަކުން ލިބޭނެ އިންތިޒާމު ހަމަޖެއްސުމަށް ނިންމެވިކަންވެސް ސަރުކާރުން ވަނީ ހާމަކޮށްފައެވެ.
