މި މަޝްވަރާތައް ކުރިއަށް ގެންގޮސްފައިވަނީ ޔޫކޭގެ ހައި ކޮމިޝަނަރު ކެރޮން ރޯސްލާ، މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ މިނިސްޓަރު ޠާރިގް އިބްރާހީމްއާ ބައްދަލުކުރެއްވުމުގައި އެވެ.
މިއީ ހައި ކޮމިޝަނަރުގެ ވަދާއީ ބައްދަލުވުމެއްގެ ގޮތުގައި ކްލައިމެޓް ޗޭންޖް، އެންވަޔަރަންމަންޓް އެންޑް އެނާރޖީ މިނިސްޓްރީގައި ބޭއްވި ބައްދަލުވުމެކެވެ. މި ބައްދަލުވުމުގައި ދެ ގައުމުގެ ދެމެދު ތިމާވެށީގެ ދާއިރާއިން އޮންނަ ގުޅުން އިތުރަށް ހަރުދަނާކުރުމަށް މަޝްވަރާކުރެވުނެވެ.
މިނިސްޓަރު ތާރިގް ވިދާޅުވީ ހައި ކޮމިޝަނަރުގެ ލީޑަރޝިޕްގެ ދަށުން ދެ ގައުމުގެ ދެމެދު ތިމާވެށީގެ ދާއިރާއިން އެއްބާރުލުން އިތުރުކުރުމަށް ގިނަ މަސައްކަތްތަކެއް ކުރެވިފައިވާ ކަމަށެވެ. އަދި ކުރިއަށް އޮތް ތަނުގައިވެސް މި ގުޅުން އިތުރަށް ބަދަހިވެގެންދާނެ ކަމުގެ އުންމީދު އޮތް ކަމަށް ވިދާޅުވި އެވެ.
މި ބައްދަލުވުމުގައި މޫސުމަށް އަންނަ ބަދަލުތަކާ ގުޅޭގޮތުން ދެ ގައުމުން ކުރަމުންދާ މަސައްކަތްތަކާ ބެހޭގޮތުން ވެސް މަޝްވަރާކުރެވުނެވެ.
