އަންނަ އަންގާރަ ދުވަހު އެމްޑީޕީން މާލޭގައި ބާއްވާ "ގާނޫނުއަސާސީގެ ދިފާއުގައި ރައްޔިތުން"ގެ ޖަލްސާއަށް ތައްޔާރުވުމުގެ ގޮތުން ރޭ ބޭއްވި އެ ޕާޓީގެ ޖަގަހަ ޖަލްސާގައި ފައްޔާޒު ވަނީ ސަރުކާރަށް ވަރަށް ބޮޑަށް ފާޑުވިދާޅުވެފަ އެވެ. މި ސަރުކާރުގެ ސިޔާސަތުތައް ހުރީ އާންމު ރައްޔިތުންނަށް ވަރަށް އުނދަގޫވާ ގޮތަށް ބައްޓަންކޮށްފައި ކަމަށާއި އެ އުސޫލު ކަންކަން ކުރުން ހުއްޓާލަންޖެހޭ ކަމަށް އޭނާ ވިދާޅުވި އެވެ.
އޭނާ ވިދާޅުވީ ވެރިކަމުގައި ތިއްބެވި ބޭފުޅުންނަށް ވިސްނައިދެވޭތޯ އެކިއެކި ގޮތްގޮތުން މަސައްކަތް ކުރެއްވި ކަމަށެވެ. ނަމަވެސް ވެރިކަމުގެ އާރާއިބާރު އޮތީމާ އެވާހަކަތަކަށް އިޖާބަ ދިނުމެއް ނެތި، އާންމު ރައްޔިތުންގެ ތާއީދު މި ސަރުކާރަށް އޮތްކަން ދައްކަން މަސައްކަތް ކުރަމުން ގެންދާ ކަމަށް ފައްޔާޒް ވިދާޅުވި އެވެ.
އިތުރަށް ވާހަކަ ދައްކަވަމުން ފައްޔާޒު ވިދާޅުވީ އެމްޑީޕީ ކުރާ މަސައްކަތަކީ ގާނޫނު އަސާސީގެ އިމުގެ ތެރެއިން ސަރުކާރު ޖަވާބުދާރީ ކުރުވުމުގެ މަސައްކަތް ކަމަށެވެ. އެމްޑީޕީއަކީ ވެރިކަމުގައި ތިއްބެވި ބޭފުޅުން ބާލާ ބައެއް ނޫން ކަމަށް ފައްޔާޒު ވިދާޅުވި އެވެ. އަދި އެ އެޕާޓީން މަސައްކަތް ކުރާނީ ސަރުކާރު ހަމަ މަގަށް އެޅުވުމުގެ މަސައްކަތް ކަމަށް ފައްޔާޒު ވިދާޅުވި އެވެ.
ފެށިގެން މިދަނީ ސިލްސިލާ ހަރަކާތްތަކެއް ކަމަށް ވިދާޅުވެ، އެ ހުރިހާ ހަރަކާތްތަކެއްގައި ބައިވެރިވެ ސަރުކާރު ޖަވާބުދާރީ ކުރުވުމަށް މަސައްކަތް ކުރެއްވުމަށް ފައްޔާޒް ގޮވައިލެއްވި އެވެ. ފައްޔާޒު ވިދާޅުވި ގޮތުގައި މިއަދު ވެރިކަމުގައި ތިއްބެވީ ގާނޫނުއަސާސީ ގެނައުމާ ދެކޮޅަށް މަސައްކަތްކުރެއްވި ބޭފުޅުންތަކެއް ކަމަށެވެ.
ސަރުކާރު ޖަވާބުދާރީ ކުރުވަން ޖެހެނީ ޖަލްސާ ބާއްވައިގެން ކަމަށް ވިޔަސް ނުވަތަ މަގުމައްޗަށް ނުކުމެ މުޒާހަރާ ކޮށްގެން ކަމަށް ވިޔަސް، އެމްޑީޕީން އެކަން ކުރާނެ ކަމަށް ފައްޔާޒް ވިދާޅުވި އެވެ. އޭނާ ވިދާޅުވީ ގާނޫނުއަސާސީގެ ދިފާއުގައި އެމްޑީޕީން ނިކުތް އެންމެ މުހިއްމު ސަބަބަކީ ރާއްޖޭގައި މިހާރު މި އޮތް ގާނޫނުއަސާސީއަކީ އެމްޑީޕީން ހޯދި އެއްޗަކަށް ވާތީ ކަމަށެވެ.
