އުމަރު މިހެން ވިދާޅުވީ ސީއެންއެމް އިން ގެނެސްދޭ "ނޭޝަން ޓޯކް" ޕޮޓްކާސްޓު ގައި ވާހަކަ ދައްކަވަމުންނެވެ.
"ސީއެންއެމް" އިން އަންނަނީ ދައުލަތް ނުވަތަ ސަރުކާރު ހިންގުމަށް މިހާރުއޮތް އޮނިގަނޑު ބަދަލުކޮށް، ބޮޑުންގެ ގޭދޮށުގައި މުގޯލި އަޅަން ނުޖެހި ދިރިއުޅެވޭނެކަން ކަށަވަރުވާ ފަދަ ހިންގުމުގެ އާ އޮނިގަނޑެއް ހޯދުމަށް ރައްޔިތުން ހޭލުންތެރި ކުރުމަށް މަސައްކަތްތަކެއް ކުރަމުން ނެވެ.
"ނޭޝަން ޓޯކް"ގެ ހަތް ވަނަ ޕްރޮގްރާމްގައި ވާހަކަ ދައްކަވަމުން ނިމުނު ރިޔާސީ އިންތިހާބުގައި ވެސް އަމިއްލަ ގޮތުން ވާދަ ކުރެއްވި އުމަރު ވިދާޅުވީ ގާނޫނު އަސާސީ އަށް ގެނެވޭ ބައެއް ބަދަލުން ވަރަށް ބޮޑަށް "ރައްޔިތުންގެ ބާރު" ކުޑަވެ ސިޔާސީ ޕާޓީތަކުގެ ބާރު އެބަ ގަދަވާ ކަމަށެވެ.
އުމަރު ވިދާޅުވީ 1965 ގެ ޖުމުހޫރިއްޔާ އިން ފަށާނަމަ ޖުމްހޫރިއްޔަތެއް ދިވެހި ރާއްޖެއަށް އައި ހިސާބުން ރައްޔިތުން ކައިރިއަށް ކަންކަމުގައި ސީދާ މަޝްވަރާ ކުރުން ފެށުނު ކަމަށެވެ. އެގޮތުން ފުރަތަމަ ކުރިކަމަކީ ވެރިއަކު ކަމުދޭހޭ ނޫނީ "ވެރިއަކަށް މީނަ ފެނޭހޭ ނުވަތަ ނޫންހޭ"، ރައްޔިތުން ގާތު އެހުން ކަމަށެވެ. އެގޮތުން ރައްޔިތުންގެ ބާރުވެރިކަން ފެށުނު މިދެންނެވުނު ޕޮއިންޓުގެ ކުރިން ބާރު އޮތީ ރަސްގެފާނު ނުވަތަ ޕްރައިމް މިނިސްޓަރު އަތުގައި ކަމަށެވެ. މިހާލެއްގައި އޮތުމަށް ފަހު ދެން މުހައްމަދު އަމީން، އިބްރާހިމް ނާސިރު، މައުމޫން އަބުދުލްގައްޔޫމްގެ ދިގު 30 އަހަރުގެ ވެރިކަމަށްފަހު ދިވެހިންނަށް "މަލްޓި ޕާޓީ" ނިޒާމެއް ލިބުނު ކަމަށެވެ.
އުމަރު ވިދާޅުވީ ސިޔާސީ ޕާޓީތައް އުފެދި ޕާޓީ ނިޒާމް ފެށިގެން އައި ކޮޅުމަތީގައި ވަރަށް ބޮޑަށް ކަންކަމުގައި ރައްޔިތުން ކުރެ އަހަމުން ގެންދާތަން ފެނުނު ކަމަށާއި އެގޮތުން ނަޝީދު އާއި ވަހީދު ވެރިކަމުގައި އަދި ކޮންމެސް ވަރަކަށް ޔާމީން ވެރިކަމުގެ ކުރީކޮޅު ރައްޔިތުންގެ ހިޔާލާއި މަޝްވަރާ އަށް ފުރުސަތު ލިބުނު ކަމަށެވެ. ނަމަވެސް ޔާމީން ވެރިކަމުގެ ވަކި ހިސާބަކުން ރައްޔިތުންގެ މަޝްވަރާ އާއި ފެއަށް ގޮސް ސީދާ ޕާޓީގެ އަތުގައި ނޫނީ ވެރިމީހާގެ އަތަށް ބާރުތައް ޖަމާކުރަން ފެށުނު ކަމަށެވެ. އަދި ނިމުނު ވެރިކަމާއި މިހާރު ހިގަމުންދާ ވެރިކަމުން ފެންނަ މަންޒަރަކީ މިހާރު ރައްޔިތުން ކައިރީ ކަމަކު އަހާލަން ޖެހޭނެ އެއްވެސް ސަބަބެއް ނެތް ކަމަށް ދޭހަކޮށް ދޭން އުޅޭ ތަން ކަމަށެވެ. އަދި މިހާރު ސިޔާސީ ވެރިންނަށް ވިސްނިފައި އޮންނަނީ ރައީސުލްޖުމުހޫރިއްޔާ އަކީ ފަސް އަހަރަށް ހޮވިފަ ހުރި މީހެއް ކަމަށާއި ދެން އޭނާ ރައްޔިތުން ފަޅިއަށް ނުޖެހި ވެސް ފަސް އަހަރުގެ ވެރިކަމުގެ ދައުރު ނިންމި ދާނެ ކަމަށެވެ.
އުމަރު ވިދާޅުވީ ރައީސުލްޖުމްހޫރިއްޔާ ދައުލަތް ހިންގާ ގޮތާއި ސަރުކާރު ހިންގާ ގޮތަށް ފާރަވެރިވާން އޮތް ރައްޔިތުންގެ މަޖިލީހުގެ ހާލަތު އަދި މިހާރު މާ ގޯސް ވެއްޖެ ކަަމަށެވެ. އެގޮތުން އުމަރު ވިދާޅުވީ ރައްޔިތުންގެ މަޖިލީހުގެ މެންބަރުން އެއީ ހަމައެކަނި ސިޔާސީ ޕާޓީ މީހުން އިންތިހާބުކުރި ބައެއްވެސް ކަމަށް ދައްކަން މަސައްކަތް ކުރާ ކަމަށެވެ.
އުމަރު ވިދާޅުވީ ޖުމުހޫރިއްޔަތެއް ފެށުނު އިރުގައި ރަައްޔިތުންގެ އަތުގައި އޮތް ކަމަށް ބެލެވުނު ބާރުތައް މިހާރު މި އޮތީ ސިޔާސީ ޕާޓީތަކުގެ ލީޑަރު އަތުގައި ކަމަށެވެ. އެހެން ކަމުން މި އަންނަނީ ރައްޔިތުންގެ އަތުގައި އޮތް ބާރުތައް ހަނިވަމުން އަދި ރައްޔިތުން ކައިރީ އަހާލާ ރައްޔިތުން ބޭނުންވާ ކަންކަން ބޭނުންވާ ގޮތަށް ބޭއްވުމާ ދުރަށް ދަތުރު ކުރާ މަންޒަރު ކަމަށެވެ.
އުމަރު ވިދާޅުވީ ދައުލަތް ހިންގުމުގައި ގަވަރނަންސް ގައި މި ފެންނަ ތިން ލޭޔަރުކަމުގައިވާ ރައީސުލްޖުމްހޫރިއްޔާ އެއް އިންތިހާބު ކުރުމާއި ރައްޔިތުންގެ މަޖިލިސް އަށް ރައްޔިތުން އިންތިހާބު ކުރާ މަންދޫބުން ތަކެއް ގާނޫނު ހެދުމަށްޓަކާ ފޮނުވާ އަދި ރަށު އަދި އަތޮޅު ފެންވަރުގައި ގަވަރނަންސް ބެލެހެއްޓުމަށް އިންތިހާބުކުރާ ކައުންސިލަރުންނާއި މޭޔަރުން ކަމަށެވެ. މި ތިން ލޭޔަރު އެކަތި އެނެކެއްޗަށް ސިޔާސީ ޕާޓީތަކުގެ މެދުގައި ބަދެވިގެން ދިއުމުގެ ނަތީޖާ އަކީ "ބްލައިންޑް ލޯޔަލްޓީ" ކަނެއް ގޮތަށް މަސައްކަތް ކުރަން ފެށުން ކަމަށެވެ.
އުމަރު ވިދާޅުވީ ރައީސުލްޖުމުހޫރިއްޔާ މިހޮވަނީ ރައްޔިތުން ކެމްޕޭންކޮށް ބަހުސްކޮށް ރައްޔިތުންގެ ޑައިރެކްޓް ވޯޓަކުން ކަމަށާއި ރިޔާސީ ނިޒާމުގަ އޮންނަ ސިފައަކީ ރަޢީސް ކަމަށް ހޮވޭ މީހާއަށް މުއްދަތެއް ދިނުން ކަމަށެވެ. ނަމަވެސް ރައީސް ކަމަށް އަންނަ ބޭފުޅަކު ހުރިހާ ބާރެއް ނަގާ އަތަށް އޮޅާލާ މަންޒަރު އެއީ އަސްލުގައި ރިޔާސީ ނިޒާމު ވެސް ނުދަންނަ ކަންކަން ކަމަށެވެ. ވެރިމީހާ އަވަސް އަވަހަށް ބަދަލުވުން ވެސް ނުރައްކާކަން ފާހަކުރައްވާ އުމަރު ވިދާޅުވީ އިރުއިރުކޮޅާ ރައީސް މީހާ ބަދަލު ކުރުމަކީ "ވަރަށް ޑޭންޖަރ" ކަމެއް ކަމަށެވެ. ނަމަވެސް ރައީސުލްޖުމްހޫރިއްޔާ ކުރޮސް ޗެކްކުރާ ނިޒާމު ކަމަށްވާ ރައްޔިތުންގެ މަޖިލިސް މިއަދު މިފެންނަނީ ގުރާތަކެއް ހެން ކަމަށާއި ޕާޓީގެ ލީޑަރުގެ ގައިގާ ބަނދެވިފައިވާ ތަން ކަމަށެވެ. މިހެން ކަންކަން ދާނަމަ ކުރިއަށް އޮތްތަނުގައި ރައީސުލްޖުމްހޫރިއްޔާގެ ރިކޯލް އެއްގެ ވާހަކަ ވެސް ދެއްކުން ގޯސް ނޫން ކަމަށާއި އެ ވާހަކަތަކުގައި ބާރުވެރިކަމެއް ހުރިކަމަށް އެއްބަސްވެވޭ ކަމަށެވެ.
އާ ގާނޫނު އަސާސީ ދިވެހިންނަށް ލިބުނުއިރު އެއީ އެންމެ ފުރިހަމަ ޑޮކިޔުމެންޓެއް ނޫން ކަމަށާއި މުހިއްމު ދެ ސިފައެއް ނުހިމަނާ ދޫކޮށްލެވިފައި ވާކަން ފާހަގަކުރައްވާ އުމަރު ވިދާޅުވީ މަޖިލިސް މެންބަރުންނަށް ރިޔާސީ ނިޒާމެއްގައި ދޭންޖެހޭ ދެ ސިފަ ނުދީ ވާކަމަށެވެ. އެއީ އަމިއްލަ އިހްތިޔާރުގައި ހިޔާލް ފާޅުކޮށް ވޯޓްލުމުގެ ހައްގު އޭނައަށް ލިބެންޖެހުމާއި އަދި އޭނާ ކަމުނުދާ ނަމަ އޭނާގެ މައްޗަށް އިންތިހާބުކުރި ރައްޔިތުންގެ ފަރާތުން ޕެޓިސަން ކުރީމަ އިލެކްޝަންކޮމިޝަން އިން ރިކޯލް ވޯޓް ނެގުން ކަމަށެވެ.
އުމަރު ވިދާޅުވީ ރައްޔިތުންގެ މަޖީލީހުގެ މެންބަރަކަށް އެއްވެސް ސިޔާސީ ޕާޓީއަކުން ވަކި ގޮތަކަށް ވޯޓުލާން އަމުރެއް ނުކުރެވޭނެ ކަމަށާއި އަދި މެންބަރު އަކީ ޖަވާބުދާރީ ވާންޖެހޭ މީހެއްކަމަށާއި އެކަން ކުރަން ވާނީ އޭނާގެ މައްޗަށް ނެނގޭ ރިކޯލް ވޯޓުން ކަމަށެވެ.
އުމަރު ދެން ވިދާޅުވެ ދެއްވީ ރާއްޖޭގައި ސިޔާސީ ޕާޓިތައް ހިންގަމުން ދާގޮތުން ނިޒާމަށް އޮތް ނުރައްކަލުގެ ވާހަކަ އެވެ. އެގޮތުން އޭނާ ވިދާޅުވީ ޕާޓީގެ ލީޑަރުން ވެސް އަންނަން ވާނީ އިންތިހާބަކުން ކަމަށް ގާނޫނެއްގައި ލިޔަން ޖެހޭ ކަމަށެވެ، ނަމަވެސް މިކަން ކުރަން ވެސް ރާއްޖޭގެ ހިންގާ ސިޔާސީ ޕާޓީތަކުން ބޭނުން ނުވާ ކަމަށެވެ.
އުމަރު އިތުރަށް ވިދާޅުވީ ރައްޔިތުންގެ ފަޅިއާއީ ސިޔާސީ މީހުންގެ ފަޅި އަކީ ދެ ފަޅި އެއް ކަމަށާއި ސިޔާސީ މީހުން އަތުގަ ތާ އަބަދު ބާރު ބާއްވަން ހެޔޮ ނުވާނެ ކަމަށެވެ. އެހެން ކަމުން، ރައްޔިތުން ދިން ބާރު އެބިއުސް ކޮށްފިއްޔާ އަނބުރާ އަތުލުމަށް ރިކޯލް ވޯޓަކުން އެޝުއަރ ކުރެވިދާނެ ކަމަށެވެ.
އުމަރު ވިދާޅުވީ މި ވަގުތަށް ދުނިޔެ އެކުސެޕްޓް ނުކުރާ އެއްވިސްނުމަކީ ރައީސުލްޖުމުހޫރިއްޔާ އަށް ރިކޯލް ވޯޓެއް ނެގުން ކަމަށެވެ. ނަމަވެސް ދެ ވަނަ ވިސްނުމެއް މިހާރު ދުނިޔޭގަ އެބަ ގެންގުޅޭ ކަމަށާއި އެއީ މިބުނާ ޑައިރެކުޓް ޑިމޮކްރަޓިކް ވިސުނުމެއް ކަމަށެވެ. ނަމަވެސް ގިނަ ފަހަރު ފެންނަނީ ޑިކްޓޭޓަރުވެ ބާރުތައް އޮޅާލާތަން ކަމަށެވެ. ސިޔާސީ މީހުން ހުރިހާ ބާރެއް ނަގާއިރު ރައްޔިތުން ހަމަ ހުރިގޮތަށް ތިބޭނީޔޭ ހީކުރުން ވެސް އަދި ގޯސް ކަން އުމަރު ފާހަގަ ކުރެއްވި އެވެ.
ފަސް އަހަރުން ރައްޔިތުން ވޯޓުލީމަ ނިމޭ ގޮތައް އޮންނަ ނިޒާމެއްގައި ރައްޔިތުންނަށް ގާނޫނު އަސާސީގެ 4 ވަނަ މާއްދާގަ ބުނާ "ދިވެހި ދައުލަތުގެ އެންމެހާ ބާރުތައް ފެށިގެން އަންނަނީ ރައްޔިތުންގެ ކިބައިންނެވެ. އަދި މި ބާރުތައް ދެމި އޮންނަނީ ރައްޔިތުންގެ ކިބައިގަ އެވެ" މި ބާރު ފެށި އަދި ދެމި އޮތްކަމުގެ އިހްސާސް ހިނގާ ކަމަށް ބުނާ ބުނުން އެއީ ހަގީގަތަކަށް ހަދާ ރައްޔިތުންނަށް ބާރުތަކެއް ދިނުމަށް ވިސްނާ ރައްޔިތުންގެ އަތްމަތީގައި ރައްޔިތުންގެ ބާރު އޮންނާނެ ހިންގުމުގެ އޮނިގަނޑެއްގެ ވާހަކަ އުފަން ކުރުވައިގެން އޭގެން ގައުމަށް މަންފާއެއް ލިބޭނެ އާ ގޮތްތަކާއިމެދު ވިސްނުން އަދި އެ މަގަށް ބަހުސްކުރުމުގެ މުހިންމުކަމަށް އުމަރު ވެސް ތާއީދުކުރެއްވި އެވެ.
އުމަރު ވިދާޅުވީ ރައީސުލްޖުމްހޫރިއްޔާގެ ރިކޯލެއްގެ ބަހުސް ގަދަވަމުންދާ އެއް ސަބަބަކީ ރައީސުލްޖުމްހޫރިއްޔާގެ މަގާމަށް ހޮވޭ މީހާ ޖަވާބު ދާރީ ކުރުވާ މަގާމުން ދުރުކުރެވޭނެ މެކޭނިޒަމެއް ރައްޔިތުންގެ މަޖިލިސް ތެރެއިން ކުރެވެން މިހާރު އޮތް ނަމަވެސް ރައްޔިތުން މަޖިލިސް ސަރުކާރުގެ މުށުގައި "ލޮކް" ކުރެވިފަ އޮތުން ކަމަށެވެ. އަދި ޕާޓީގެ މުށުގައި ބަނދެވުން ކަމަށެވެ.
އުމަރު އިތުރަށް ވިދާޅުވީ ރައީސުލްޖުމްހޫރިއްޔާގެ ނޯ ކޮންފިޑޭންސް ނަގަން ރައްޔިތުން އަތަށް ދޭން އެހާ ތާއީދު ނުކުރައްވާ ކަމަށާއި ސަބަބަކީ އެފުރުސަތު ރައްޔިތުން މަޖިލިސްގައި އޮތުން ކަމަށެވެ. ނަމަވެސް ކޮންމެ ރައީސް އަކުވެސް އިންތިހާބު ވުމާއިއެކު ރައްޔިތުން މަޖިލިސް "ވާ" ކޮށްލުން އެއީ ޝަކުވާއެއް ކަމަށާއި އަދި މަޖިލީހުގެ ގާނޫނީ ޒިންމާގެ ބައެއް އިސްކޫރުތައް ބާރުނުކުރެވޭ ނަމަ ނުވަތަ ޕްރެކްޓިސް ނުކުރެވޭ ނަމަ ދެން ދައްކަން އެންމެ ހެޔޮ އެއް ވާހަކަ އަކީ ވެރިކަން ހިންގުމުގެ އާ އޮނިގަނޑު އިސްލާހުކޮށް ރައްޔިތުންގެ އަތުގައި ބާރުތައް ދެމި އޮންނާނެ އާ މެކޭނިޒަމް ތަކެއް ތައާރަފް ކުރުމުގެ "ޓޯކް" ކަމަށެވެ.
