ފިނޭންސް މިނިސްޓްރީން އާއްމުކުރި ހިސާބުތައް ދައްކާގޮތުން ސަރުކާރު ހިންގުމަށް ދުވަހުން ދުވަހަށް ކުރާ ރިކަރަންޓް ހަރަދު ވަނީ 1.2 ބިލިއަން ރުފިޔާ އިތުރުވެފައެވެ.
ހިސާބުތައް ދައްކާގޮތުން މިއަހަރުގެ ނޮވެމްބަރު މަހުގެ 28 ވަނަ ދުވަހާއި ހަމައަަށް މިއަދަދު ވަނީ 30 ބިލިއަނަށް އަރާފައެވެ. މިދިޔަ އަހަރުގެ މި މުއްދަތުގައި ރިކަރަންޓް ހަރަދުގެ ގޮތުގައި ހޭދަކޮށްފައިވަނީ 28.8 ބިލިއަން ރުފިޔާއެވެ.
ފިނޭންސް މިނިސްޓްރީގެ ހިސާބުތައް ދައްކާގޮތުން ރިކަރަންޓް ހަރަދު މައްޗަށް އަރާފައިވަނީ މުސާރަތަކާއި އެލަވަންސްތަކަށް ކުރާ ހަރަދުތައް އިތުރުވުމުންނެވެ. މިގޮތުން 12.3 ބިލިއަން ރުފިޔާ މިއަހަރު މުސާރަތަކަށް ވަނީ ދައުލަތުން ހޭދަކޮށްފައެވެ. މީ މިދިޔަ އަހަރުގެ މި މުއްދަތާއި އަޅާ ބަލާއިރު 1.4 ބިލިއަން ރުފިޔާ އިތުރު އަދަދެކެވެ. މިދިޔަ އަހަރުގެ މި މުއްދަތުގައި ދައުލަތުން މުސާރަތަކަށް ހޭދަކޮށްފައިވަނީ 10.9 ބިލިއަން ރުފިޔާއެވެ.
ރިކަރަންޓް ހަރަދު ބޮޑިވި ނަމަވެސް މިދިޔަ އަހަރަށްވުރެ މިއަހަރުގެ ކެޕިޓަލް ހަރަދަށް ކުރި ހޭދަވަނީ ކުޑަވެފައެވެ. މި އަހަރުގެ މިހާތަނަށް ކެޕިޓަލް ހަރަދުގެ ގޮތުގައި ހިންގާފައިވަނީ 12.7 ބިލިއަން ރުފިޔާއެވެ. މިދިޔަ އަހަރު މިއަދަދު ހުރީ 13 ބިލިއަން ގައެވެ. އެހެންކަމުން 456 މިލިއަންގެ ދަށްވުމެކެވެ.
