"އެމްއެމް ޓީވީ" މެދުވެރިކުރައްވައި މިނިސްޓަރު ޝަހީމް ވިދާޅުވީ މި އަހަރަކީ އިސްލާމީ ކަންތައްތަކަށް އާ ދިރުމެއް ލިބިގެންދާނެ އަހަރެއް ކަމަށެވެ. އެގޮތުން މިހާރު ވެސް ވަނީ ގިނަ މަސައްކަތްތަކެއް ފަށާފައި ކަމަށް އެ މިނިސްޓަރު ވިދާޅުވި އެވެ.
މިނިސްޓަރު ޝަހީމް ފާހަގަކުރެއްވި ގޮތުގައި މިހާރު ވެސް ޒަކާތު ހައުސްގެ މަސައްކަތްތައް ވަނީ ފެށިފައެވެ. އަދި މިދިޔަ އަހަރާ އަޅާބަލާއިރު މުދަލު ޒަކާތުގެ ގޮތުގައި ލިބުނު އާމްދަނީ 17 ޕަސެންޓު އިތުރުވެފައިވާ ކަމަށް މިނިސްޓަރު ވިދާޅުވި އެވެ.
މީގެ އިތުރުން މިސްކިތްތައް މަރާމާތު ކުރުމާއި، މިސްކިތްތަކާ ގުޅޭ ކަންކަމުގައި ސަރުކާރަށް އިޝްތިހާރީ ލަފާ ދޭނެ ކޮމެޓީއެއް އެކުލަވާލުމުގެ މަސައްކަތް ވެސް ފަށާފައިވާ ކަމަށް އެ މިނިސްޓަރު ވިދާޅުވި އެވެ. އަދި ރައީސް ޑރ. މުހައްމަދު މުއިއްޒުގެ މެނިފެސްޓޯގައި ހިމެނޭ ފަގީރުން ހައްޖަށް ފޮނުވުމުގެ މަސައްކަތް ވެސް މިއަހަރު ފަށާފައިވާ ކަމަށް އެ މިނިސްޓަރު ވިދާޅުވި އެވެ.
