ކުއިޓް ލައިންގެ ގޮތުގައި ތައާރަފުކޮށްފައިވާ ނަމްބަރު 1671 މި ހިދުމަތް މިއަދުން ފެށިގެން އެޗްޕީއޭ މެދުވެރިކޮށް ލިބެމުންދާނެކަން ހެލްތު މިނިސްޓްރީން މައުލޫމާތުދެ އެވެ.
ކުއިޓް ލައިންގެ ހިދުމަތް މިއަދު ފަށާފައިވާއިރު ހެލްތް މިނިސްޓަރު ނާޒިމް ވިދާޅުވީ ދުންފަތުން ދުރުވާ ބޭނުންވާ މީހުންނަށް ބޭނުންވާ ތަކެތި އާސަންދަ މެދުވެރިކޮށް ލިބޭނެ އިންތިޒާމުތައް ހަމަޖެއްސުމުގެ މަސައްކަތް މިހާރު ކުރަމުން އަންނަކަމަށެވެ.
ރާއްޖޭގެ ހުރިހާ ސިޓީތަކާއި ރަށްތަކުގައި "ޓޮބޭކޯ ސިޒޭޝަން ކްލިނިކް" ސިނގިރޭޓާ ދުރުކޮށްދޭ ކްލިނިކްތައް ގާއިމުކުރުމަށް ރައީސް ޑރ. މުހައްމަދު މުއިއްޒު ވަނި ނިންމާފަ އެވެ.
އޭގެއިތުރުން ދުންފަތުގެ އިސްތިއުމާލުކުރުން ހުއްޓާލަން ބޭނުންވާ ފަރާތްތަކަށް ބޭނުންވާ ބޭސް، އެސްޓީއޯ މެދުވެރިކޮށް ރާއްޖޭގެ ހުރިހާ ސިޓީތަކާއި އަތޮޅު ހޮސްޕިޓަލް ގާއިމުކޮށްފައިވާ ރަށްތަކުން ލިބޭނެ އިންތިޒާމު ހަމަޖެއްސުމަށް ނިންމެވިކަންވެސް ސަރުކާރުން ވަނީ ހާމަކޮށްފަ އެވެ.
ރައީސް މުހައްމަދު މުއިއްޒު ވަނީ ވޭޕްކުރުމަށް ބޭނުންކުރާ ތަކެތި ރާއްޖެއަށް އެތެރުކުރުން 15 ނޮވެމްބަރު އިން ފެށިގެން މަނާކޮށްފައެވެ. އަދި ދުންފަތުގެ އުފެއްދުންތަކުގެ ވިޔަފާރީގެ މުއާމަލާތްކުރެވޭ އެންމެ ހަގު އުމުރަކީ 21 އަހަރު ކަމަށް ކަނޑައެޅުމަށް ގާނޫނަށް އިސްލާހު ގެނައުމަށް ވެސް ނިންމަވާފައިވެ އެވެ.
