އެމަނިކުފާނު މިހެން ވިދާޅުވީ އއ.މަތިވެރީ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގަ އެވެ. އއ އަތޮޅަކީ އެއާޕޯޓެެއް ނެތް އަތޮޅެކެވެ. އެއަތޮޅުގެ ދެކުނުބުރީގައި އެއާޕޯޓެެއް އެބަ އޮތެވެ. އެއީ އދ މާމިގިލީގަ އެވެ. އެއީ ވިލާ ކުންފުނިން ތަރައްގީކޮށް ހިންގަމުންދާ އެ ކުންފުނީގެ އަމިއްލަ އެއާޕޯޓެކެވެ.
ރައީސް އއ. އަތޮޅަށް ކުރައްވާ ދަތުރުފުޅުގައި މިރޭ އެ ރަށުގެ ރައްޔިތުންނާ ބައްދަލުކުރައްވައި ވިދާޅުވީ އެއާޕޯޓެއް އެޅުމަކީ މަތިވެރި ދާއިރާއަށް ވަރަށް މުހިންމު ކަމެއް ކަމަށެވެ. ޓޫރިޒަމަށް ބަރޯސާވެފައިވާ މި އަތޮޅަށް އެއާޕޯޓެއް ބޭނުންވާ ކަމަށް ރައީސް ވިދަޅުވި އެވެ.
ރައީސް ވިދާޅުވީ މަތިވެރީގައި އެއާޕޯޓެއް ތަރައްގީކުރުމަށް ނިންމެވީ، އއ އަތޮޅަކީ ގިނަ ރިސޯޓްތަކެއް ހިންގާ އަދި ފަތުރުވެރިކަންވެސް ފުޅާވެފައިވާ ސަރަހައްދެއްކަމުގައިވާތީކަމަށެވެ. އެހެންކަމުން އއ. އަތޮޅަށް އެއާޕޯޓެއް ކޮންމެހެން މުހިންމުކަމަށް ރައީސް ވިދާޅުވި އެވެ.
މަތިވެރީގައި މިވަގުތު 18 ގެސްޓްހައުސް ހިންގަމުންދާއިރު ރައީސް ވިދާޅުވީ މުޅި ރާއްޖެ ދަތުރުފަތުރުން ގުޅާލުމަށް ކުރާ މަސައްކަތުގެ ދަށުން އއ އަތޮޅަކީ އެއަރޕޯޓެއް އޮންނަންޖެހޭ ސަރަހައްދެއްކަމަށެވެ. އަދި އިތުރު ގެސްޓްހައުސް އިމާރާތްކުރުމުގެ މަސައްކަތް ކުރެވެމުން އަންނައިރު، އެއާޕޯޓާއެކު މުޅި ސަރަހައްދަށް އިގްތިސާދީގޮތުން ކުރިއެރުން އަންނާނެކަމަށް ރައީސް ވިދާޅުވި އެވެ.
އެ ދާއިރާގެ މަޖިލިސް މެމްބަރު ހަސަން ޒަރީރު ވިދާޅުވީ އެއާޕޯޓަކީ އެ ރަށުގެ ރައްޔިތުން ވަރަށް ގިނަ ދުވަސް ވަންދެން ދެކެމުން އައި ހުވަފެނެއް ކަމަށެވެ.
ރައީސް ވިދާޅުވި ގޮތުގައި މި އަހަރު އެއްވެސް މަސައްކަތެއް ނުކުރެވުނީ ސިޔާސީ ވިސްނުމެއްގައި މި ސަރުކާރަށް އުނދަގޫކުރަން، އޭރުގެ ސަރުކާރުން ފާސްކުރި ބަޖެޓުގެ ސަބަބުންނެވެ. ނަމަވެސް އަންނަ އަހަރު ވާނީ އެ މަނިކުފާނުގެ ރިޔާސީ ވައުދުތައް ފުއްދުމުގެ މަސައްކަތްތައް ބާރަށް ކުރިއަށްދާނެ ދެ އަހަރަށް ކަމަށް ރައީސް ވިދާޅުވި އެވެ.
