ނޭޝަނަލް އެސެސަރ ޓްރެއިނިންގް ޕްލޭނަކީ ދިވެހިރާއްޖޭގައި ފަންނީ ހުނަރުވެރި މަސައްކަތްތެރިން ބިނާކުރުމަށް ހިންގާ ތަމްރީނު ޕްރޮގްރާމުތައް އެސެސްކުރުމުގެ މަސައްކަތުގައި ހަރަކާތްތެރިވާ ނޭޝަނަލް އެސެސަރުންގެ މަސައްކަތުގެ ފެންވަރު އެއް މިންގަނޑެއްގައި ދެމެހެއްޓުމަށްޓަކައި ވޯލްޑް ބޭންކުގެ އެހީގައި އެކުލަވާލާފައިވާ ޕްލޭނެކެވެ.
މިއަދު ހެނދުނު ހ. މީރުމާގައި ބޭއްވި ހާއްސަ ހަފްލާއެއްގައި ނޭޝަނަލް އެސެސާ ޓްރޭނިން ޕްލޭން ލޯންޗްކޮށްދެއްވީ ހަޔާ އެޑިޔުކޭޝަން ލޭބަރ އެންޑް ސްކިލްސް ޑިވެލޮޕްމަންޓް މިނިސްޓަރު ޑރ. މަރިޔަމް މާރިޔާއެވެ.
މި ޕްލޭން އެކުލަވާލުމުގެ ޕްރޮޖެކްޓްގެ ބައެއްގެ ގޮތުގައި ނޭޝަނަލް އެސެސާ ޓްރޭނިންގް މެނުއަލްއެއް އެކުލަވާލައި, މިހާތަނަށް 29 ފަރާތެއްވަނީ ޓްރޭނިން އޮފް ޓްރޭނާސް ފުރިހަމަކޮށްފައެވެ. އެމްއެންއެސްޑީއޭ އިން މައުލޫމާތުދޭގޮތުގައި އެ އޮތޯރިޓީގައި 201 ނޭޝަނަލް އެސެސަރުން ދަފްތަރުކޮށްފައިވާނެކަމަށް ބުނެއެވެ.
މި ހަފްލާގައި މިނިސްޓާ ޑރ. މަރިޔަމް މާރިޔާ ވިދާޅުވީ މަތީ ތައުލީމާއި ތަމްރީނުގެ ގާނޫނު (2021/7) ގެ ދަށުން މެންޑޭޓް ކުރެވިފައިވާ ގޮތުގައި، މޯލްޑިވްސް ނޭޝަނަލް ސްކިލްސް ޑިވެލޮޕްމަންޓް އޮތޯރިޓީ (އެމްއެންއެސްޑީއޭ) އަށް ވަނީ ވަރަށް މުހިންމު ޒިންމާއެއް ހަވާލުކުރެވިފައިކަމަށާއި، އެއީ ދަރިވަރުންގެ ކާމިޔާބީތައް ގައުމީ ކޮމްޕިޓެންސީ މިންގަނޑުތަކާ އަޅާކިޔައި، ވަރަށް ފުރިހަމައަށް ވަޒަންކުރާ ކޮމްޕިޓެންސީ-ބޭސްޑް އެސެސްމަންޓްތައް ހިންގުން ކަމަށެވެ.
މި ހަފްލާގައި އެމްއެންއެސްޑީއޭއިން ކުރަމުން ގެންދާ މަސައްކަތްތަކުގެ މައްޗަށް އަލިއަޅުވާލައި, އެ އޮތޯރިޓީގެ ސީ.އީ.އޯ. ޑރ. ޒަހްރާ މުހައްމަދު ހާއްސަ ޕްރެޒެންޓޭޝަނެއް ހުށަހަޅައިދެއްވި އެވެ.
މި ހަފްލާގައި މިނިސްޓްރީގެ އިސްބޭފުޅުންނާއި މިނިސްޓްރީގެ ދަށުން ހިންގާ އިދާރާތަކުގެ ސީއީއޯއިންގެ އިތުރުން، ވޯލްޑްބޭންކް ޓީމުގެ މެންބަރުންނާއި ގައުމީ އެސަސަރުން ބައިވެރިވެވަޑައިނެވި އެވެ.
