ސަރުކާރުގެ ފަރާތުން މި ބިލު މަޖިލީހަށް ހުށަހެޅުއްވީ ގަމު ދާއިރާގެ މެންބަރު ޔޫސުފް ނަޝީދެވެ. މި ބިލުގެ ބަހުސް މިއަދުގެ ޖަލްސާގައި ވަނީ ނިންމާލާފަ އެވެ.
މި ބިލު މަޖިލީހަށް ބަލައިގެނެފައިވަނީ ވޯޓުގައި ބައިވެރިވި 57 މެންބަރުންގެ އިއްތިފާގުންނެވެ. މި ބިލު މަޖިލީހަށް ބަލައިގަތުމުން ދިރާސާ ކުރުމަށް ވަނީ ޖުޑިޝަރީ ކޮމިޓީއަށް ފޮނުވާފަ އެވެ.
މި ބިލް ހުށަހެޅުމުގެ ބޭނުމަކީ ރާއްޖޭގައި މަސްތުވާތަކެތިން ވިޔަފާރިކުރުމާއި މަސްތުވާތަކެތި ޓްރެފިކްކުރުމުގެ ވިޔަފާރި އިތުރަށް ފުޅާވެ މަސްތުވާތަކެތި ގެންގުޅޭ އަދި ބޭނުންކުރާ މިންވަރު އިތުރުވަމުންދާތީ އާއި މަސްތުވާތަކެއްޗާގުޅޭ ކުށްތައް އިތުރުވަމުންދާތީ އެކަންކަން ހުއްޓުވުމަށްޓަކައި ގާނޫނު ތަންފީޒުކުރާ ފަރާތްތަކަށް ލިބިދޭ ބާރުތައް އިތުރުކުރުމެވެ.
ގާނޫނުގެ ދަށުން ކޮންޓްރޯލްކޮށްފައިވާ މަސްތުވާ އެއްޗެހީގެ އިތުރަށް އަލަށް ކޮންޓްރޯލްކުރަންޖެހޭ މަސްތުވާތަކެތި ކޮންޓްރޯލް ކުރެވޭނެ ނިޒާމެއް ތައާރަފު ކުރުމަށް ބިލްގައި ވަނީ ހިމަނާފަ އެވެ.
ބިލްގައި ހިމެނޭ މައިގަނޑު ކަންތައްތަކުގެ ތެރޭގައި މަސްތުވާތަކެއްޗަށް ދެވިހިފާފައިވާ މީހުންނަށް ދެވޭ ފަރުވާގެ ނިޒާމު ހަރުދަނާ ކުރުމާއި ޑްރަގް ކޯޓު ހިންގުމުގެ އުސޫލުތަކާއި ޑްރަގް ކޯޓުގެ ފަރުވާގެ ޕްރޮގްރާމާގުޅޭ އުސޫލުތައް މުރާޖައާކުރުން ހިމެނެ އެވެ.
މަސްތުވާތަކެއްޗާގުޅޭ ކުށްތައް ހުއްޓުވުމަށްޓަކައި ގާނޫނު ތަންފީޒުކުރާ އިދާރާތަކަށް މި ބިލްގައި ވަނީ އިތުރު ބާރުތައް ދީފަ އެވެ. އެގޮތުން ކުށްކޮށްގެން ހޯދާ މުދާ ހިފެހެއްޓުމާއި އެފަދަ މުދާ ދައުލަތަށް ނެގުމުގެ އުސޫލު މުރާޖައާކުރުމާއި ގާނޫނު ތަންފީޒުކުރުން އިތުރަށް ހަރުދަނާ ކުރުމަށް ގެންނަންޖެހޭ އިސްލާހުތައް ގެންނަން ބިލްގައި ހިމަނާފައިވެ އެވެ.
މަސްތުވާތަކެތީގެ ގާނޫނަށް އިސްލާހުތައް ހުށަހަޅާފައިވަނީ، ރައީސް ޑރ. މުހައްމަދު މުއިއްޒު އެކަން އިއުލާނުކުރައްވާފައި ވަނިކޮށެވެ. އެ މަނިކުފާނު ވަނީ މިދިޔަ މަހުގެ 26ގައި ވަރަށް އަވަހަށް މި ބިލު ހުށަހަޅުއްވާނެ ކަމަށް ވިދާޅުވެފައެވެ.
މި ބިލު ޑްރާފްޓްކުރުމުގައި ހޯމް މިނިސްޓްރީއާއި ބަންޑާރަނައިބު އޮފީހުގެ އެހީވަނީ ހޯދާފަ އެވެ.
