މަޖިލީހަށް ހުށަހަޅާފައިވާ މަސްތުވާތަކެއްޗާ ބެހޭ ގާނޫނަށް އިސްލާހު ގެނައުމުގެ ބިލަށް ބަހުސް ކުރައްވަމުން ނާޒިމް ވިދާޅުވީ މަސްތުވާތަކެތި އެތެރެވުމުގައި ކަސްޓަމްސް ހިމެނޭހެން ޔުނިފޯމް އެޅި މުއައްސަސާތަކުގެ އިހުމާލު ވެސް ވަރަށް ބޮޑު ކަމަށެވެ.
ނާޒިމް ވިދާޅުވީ ރާއްޖޭގެ ބޯޑަރު ހުރަސްކޮށް، މަސްތުވާތަކެތި އެތެރެ ނުވާނެ ކަމުގެ ޔަގީންކަން ރައްޔިތުންނަށް ދޭން ޖެހޭ ކަމަށެވެ. އަދި އެކަމަކީ މަޖިލީހުގެ މެންބަރުން ކުރަންޖެހޭ ކަމެއް ކަމަށް ނާޒިމް ވިދާޅުވި އެވެ. އޭނާ އިތުރަށް ވިދާޅުވީ ޔުނިފޯމް އެޅި މުއައްސަސާތަކުން އެކަން ކަށަވަރުކުރުމުގައި ވަރަށް ބޮޑަށް އިހުމާލުވެފައިވާ ކަމަށެވެ.
އޭނާގެ ވާހަކާގައި ވަނީ އެއާޕޯޓް މުވައްޒަފުން މެދުވެރިކޮށް މަސްތުވާތަކެތި ރާއްޖެ އެތެރެކުރަން މަސައްކަތް ކުރަމުން ދިޔަކަން ފާހަގަކޮށް އަދި އެކަން މިހާރު ހުއްޓުވާފައިވާ ކަމަށް ވެސް ވިދާޅުވެފަ އެވެ.
އަދި ނުހައްގު މުއްސަނދިކަން ހޯދަމުންދާ ފަރާތްތަަކާ މެދު ސަރުކާރުން ކުރަމުންދާ މަސައްކަތްތައް ކާމިޔާބުވަމުން އަންނަ ކަމަށް ވެސް ނާޒިމް ވިދާޅުވި އެވެ.
ނާޒިމްގެ ވާހަކައިގައި މަސްތުވާތަކެތީގެ މައްސަލަތަކުގައި މިހާރު ވެސް އުޅޭ ބޮޑުން ސަލާމަތްވާކަމާއި ޖަލުގައި ދުވަސްތައް ހޭދަކުރަން ޖެހެނީ އެހެން ބަޔެއްކަން ފާހަގަކުރައްވައި، އެކަން ހުއްޓުވަން ޖެހޭ ކަމަށް ވިދާޅުވި އެވެ.
