އއ. އަތޮޅު ކައުންސިލްގެ އިސްނެގުމަކަށް ހިންގި އިދާރީ އޮޑިޓަކާ ގުޅިގެން ފާހަގަ ކުރެވުނު ބޮޑު ވައްކަމެއްގެ ކަންކަމާ ގުޅިގެން، ފުލުހުންނަށް އެ މައްސަލަ ހުށަހެޅުމަށް ފަހު، ފުލުހުންގެ އެދުމުގެ މަތިން އޮޑިޓަރ ޖެނެރަލް ކުރިއަށް ގެންދެވި، މާޅޮހު ކައުންސިލްގެ ހާއްސަ އޮޑިޓް މިހާރުވަނީ އާއްމުކޮށްފައެވެ.
މާޅޮހު ކައުންސިލްގެ ހާއްސަ އޮޑިޓުގައިވާ ގޮތުން، ކައުންސިލްގެ އިދާރީ މުވައްޒަފަކުވަނީ، ލިޔެކުންތައް ފޯޖުކޮށް ކައުންސިލްގެ އެތައް ލައްކަ ރުފިޔާއަކަށް ހިޔާނަތްތެރިވެފައެވެ. އޮޑިޓް ރިޕޯޓުގައިވާ ގޮތުން، 2017 އަދި 2018 ވަނަ އަހަރު، އެ ކައުންސިލްގެ ބައި މިލިއަނެއްހާ ރުފިޔާވަނީ ގެއްލިފައެވެ. އެއީ، އެކި ފަހަރު މަތިން، ކައުންސިލްގެ ނަމުގައި ލިޔެކިޔުންތައް އޮޅުވާލައިގެން ނަގާފައިވާ ފައިސާކަން އޮޑިޓް ރިޕޯޓްގައި ފާހަގަކޮށްފައިވެއެވެ.
އޮޑިޓް ރިޕޯޓުގައި ފާހަގަކޮށްފައިވާ ގޮތުގައި، އޮޅުވާލައިގެންނާއި ލިޔުންތައް ފޯޖުކޮށް، ލައްކައަކަށްވުރެ ގިނަ ރުފިޔާ ނަގާފައިވެއެވެ. އަދި ކައުންސިލް އިދާރާގެ އިސްވެރިންގެ ސޮއި ފޯޖުކޮށްގެންވެސް ފައިސާ ނަގާފައިވާކަން އޮޑިޓް ރިޕޯޓުގައި ފާހަގަކޮށްފައިވެއެވެ. އެ ހިޔާނާތުގައި ހިމެނޭ އިދާރީ މުވައްޒަފު، އެކަންކަމަށް އިއުތިރާފުވެފައިވާކަންވެސް އޮޑިޓްގައިވަނީ ފާހަގަކޮށްފައެވެ.
އޮޑިޓް ރިޕޯޓުގައިވަނީ އޮޑިޓްގައި ފާހަގަ ކުރެވުނު ކަންކަން ތަހުގީގުކުރުމަށް ރިކޮމެންޑްކޮށްފައެވެ.
