ބަޔަކު މީހުން ގިނަ އަދަދެއްގެ ކޮލަރިން ފާޓާތަކެއް އަޅާލާފައިވަނީ އައްޑޫސިޓީ ހިތަދޫ ކިނބިވައު ސަރަހައްދުން ފުއްޓަރު ފަރާތަށެވެ.
މި ހަބަރު ލިބުމާއި އެކު އައްޑޫ ސިޓީގެ މޭޔަރު އަލީ ނިޒާރު ވަނީ އެ ސަރަހައްދަށް ގޮށް އެކަމުގެ ކަނބޮޑުވުން ފަޅުކުރައްވާފައެވެ. މޭޔަރު އެކްސްގައި ކުރެއްވި ޕޯސްޓެއްގައި ވިދާޅުވީ ބަޔަކު މީހުން އެ ސަރަހައްދަށް ގިނަ އަދަދެއްގެ ކޮލަރުން ފަޓާތަކެއް އޮއްސާލުމުން މަސްމަހާއި މެއްސާއި އެ ސަރަހައްދުގެ އެހެނިހެން ދިރުންތައް މަރުވެ ލައްގަމުން އަންނަކަމަށެވެ. އަދި ފަރުތެރެވެސް އެއްކޮށް ހުދުވެފައިވާކަމަށް މޭޔަރު އަލީ ނިޒާރު ވިދާޅުވިއެވެ.
ހިތަދޫ ފުއްޓަރު ސަރަހައްދަށް އަޅާފައިވާ ކޮލަރިން ފާޓާތައް
ނިޒާރޫ ވިދާޅުވީ މީ ކޮން ބަޔަކު ގެނެސްފައިވާ ކޮލަރިންތަކެއް ކަމެއް އަދި ސާފު ނުވާކަމަށެވެ. އެހެންނަމަވެސް ގިނަ އަދަދެއްގެ ކޮލަރުން ހުރުމުން މީ ސަރުކާރުގެ ކޮންމެވެސް އިދާރާއެއްގެ ބޭނުމަށް ގެނައި ތަކެތި ކަމަށް ގަބޫލުކުރެވޭކަމަށެވެ.
ނިޒާރު ވިދާޅުވީ މި މައްސަލަ ކަމާއި ގުޅޭ އިދާރާތަކާއި ގުޅިގެން ތަހުގީގުކުރަމުން އަންނަކަމަށެވެ. އަދި އެ ސަރަހައްދަށް އެއްވެސް ބަޔަކު މޫދަށް ނޭރުމަށްވެސް މޭޔަރު ވަނީ އިލްތިމާސްކޮށްފައެވެ.
