ކުޅުދުއްފުށި ސިޓީގައި އެމްޑީޕީން މިމަހުގެ 6 ވަނަ ދުވަހުގެ ރޭ ބޭއްވި ޖަލްސާއެއްގައި އަމީންގެ ހާދިސާއާ ގުޅުވާ ރައީސް ޑރ. މުއިއްޒަށް އިންޒާރުދިނީ އެ ޕާޓީގެ އެކްޓިވިސްޓެއް ކަމަށްވާ އަބްދުއްރަހްމާން އިސްމާއިލެވެ.
ޖަލްސާގައި ވާހަކަ ދަައްކަމުން އޭނާ ބުނީ މުހައްމަދު އަމީންގެ ވެރިކަމަށް ވީ ގޮތް ވެސް ދިވެހި ރައްޔިތުންނަށް ފެނިފައިވާ ކަމަށެވެ. އަދި ގާނޫނުއަސާސީއާ ކުޅޭ ކަމުގައިވާ ނަމަ، ރައީސް ޑރ. މުއިއްޒަށް ވެސް "ރީތި ކެއްސެއް" ލިބިގެންދާނެ ކަމަށް އޭނާ ބުނިއެވެ.
އެމްްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެމްޑީޕީގެ ޗެއާޕާސަން ވަނީ އެމީހާގެ ވާހަކަތައް ދިފާއުކޮށް ވާހަކަ ދައްކަވާފައެވެ. ފައްޔާޒު ވިދާޅުވީ އެމީހާ އެ ވާހަކަ ދެއްކީ ރައީސް ޑރ މުއިއްޒަށް ނަސޭހަތް ދިނުމުގެ ގޮތުންކަމަށެވެ. ފައްޔާޒު ވިދާޅުވީ "ރައްޔިތުންނަށް ދެރަ ދިނީމަ ހަދަން ޖެހޭނީ އަމީނަށް ހެދި ގޮތް" ކަމަށެވެ.
ފައްޔާޒުގެ މިވާހަތަކަށް، އަމީންގެ ކާފަދަރިކަނބަލުން އަދި އެމްޑީޕީގެ ސަރުކާރުގައި، އިނގިރޭސިވިލާތުގައި ހުންނެވި ދިވެހި ސަފީރު ޑރ. ފަރަހަނާޒް ފައިސަލް މި ވަނީ ރައްދުދެއްވާފައެވެ.
ޑރ ފަރަހަނާޒް އެކްސްގައި ފައްޔާޒުގެ އެ ވާހަކަތައް ފެންނަ ވީޑިއޯ ހިއްސާކުރައްވާ ވިދާޅުވީ އިސްލާމީ ޝަރުޢީ ހަމަތަކުން ބޭރުން މީހަކު މަރާލުމަކީ ދުވަހަކުވެސް ގަބޫލްކުރެވޭނެ ކަމެއް ނޫންކަމަށެވެ. ކޮންމެ ގޮތަކަށް ކަމެއް ކުރިޔަސް ބަޔަކުނިކުމެ މީހަކު މަރާލުމަކީ އަޅުގަނޑުމެންގެ ދީން އިސްލާމްދީން ހުއްދަކުރާ ކަމެއް ނޫންކަމަށްވެސް ފަރުހަނާޒް ވިދާޅުވިއެވެ. އަދި މި ވާހަތަކާއި އެކު ޑރ. ފަރަހަނާޒް ވަނީ ފައްޔާޒަށް ސުވާލެއްވެސް އަމާޒުކުރައްވާފައެވެ.
ފައްޔާޒު މިވާހަކަތައް ދެއްކުމުން އޭނާއަށް ވަނީ ފާޑުކިޔުންތައް އަމާޒުވެފައެވެ.
