މި އުކުޅުގައި ސްކޭމަރުން ފޯނު ކޯލްތައް މެދުވެރިކޮށް އޯޓީޕީ ކޯޑު ހޯދުމަށް މަސައްކަތްކުރާ ކަމަށް ފުލުހުން ބުނެއެވެ.
ފުލުހުން ބުނީ ސްކޭމަރުން ގުޅާފައި ބުނަނީ އެމީހުން ގުޅާ ނަންބަރަކީ ކުރިން ބޭނުންކުރި ނަންބަރެއް ކަމަށެވެ. އަދި އެކައުންޓެއް ރިކަވަރ ކުރުމަށް އޯޓީޕީ ކޯޑެއް ހިއްސާކުރުމަށް އެދޭ ކަމަށް ފުލުހުން ބުންޏެވެ. އޯޓީޕީ ކޯޑު ނުދީފި ނަމަ، އިންޓަނޭޝަނަލް ކޯލެއްގެ ނަންބަރު ހިއްސާކުރުމަށް އެދޭ ކަމަށްވެސް ފުލުހުން ބުންޏެވެ.
ފުލުހުން އިތުރަށް ބުނީ މި ނަންބަރު ހިއްސާކުރުމުން ސްކޭމަރުން އެ ނަންބަރު ބޭނުންކޮށްގެން ވައިބަރ އެކައުންޓް އެމީހުންގެ ބާރުގެ ދަށަށް ގެނެސް، މަކަރާއި ހީލަތުގެ އަމަލުތައް ހިންގާ ކަމަށެވެ.
ފުލުހުން އިލްތިމާސްކޮށްފައިވަނީ މިކަމަށް ސަމާލުވެ، ނުދަންނަ ފަރާތްތަކާ އެއްވެސް މައުލޫމާތެއް ހިއްސާ ނުކުރުމަށެވެ. އަދި މިފަދަ ސްކޭމެއްގެ ޝިކާރައަކަށް ވެއްޖެ ނަމަ ވީ އެންމެ އަވަހަކަށް ފުލުހުންނަށް އެންގުމަށް އެދިފައިވެ އެވެ.
- ސްކޭމަރުން ފޯނު ކޯލްތައް މެދުވެރިކޮށް އޯޓީޕީ ކޯޑު ހޯދަން މަސައްކަތްކުރޭ
- އިންޓަނޭޝަނަލް ކޯލްތަކުގެ ނަންބަރު ހޯދުމަށް މަސައްކަތްކުރޭ
- މިފަދަ ސްކޭމެއްގެ ޝިކާރައަކަށް ވެއްޖެނަމަ ވަގުތުން ފުލުހުންނަށް އަންގަން އެދިފައިވޭ
- ނުދަންނަ ފަރާތްތަކާ މައުލޫމާތު ހިއްސާނުކުރުމަށް ފުލުހުން އިލްތިމާސްކޮށްފައިވޭ
