
ރާއްޖޭގެ ފުރަތަމަ ރައީސް މުހައްމަދު އަމީނަށް ހެދި ގޮތް ރައީސް ޑރ. މުހައްމަދު މުއިއްޒަށް ހަދާފާނެ ކަމަށް ބުނެ އެމްޑީޕީގެ އެކްޓިވިސްޓަކު ދެއްކި ވާހަކަ އެމްޑީޕީގެ ޗެއާޕާސަން ފައްޔާޒް އިސްމާއިލް އިއްޔެ ވަނީ ދިފާއުކޮށްފައެވެ.
އެމްްޑީޕީން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެމްޑީޕީގެ ޗެއާޕާސަން ފައްޔާޒު ވިދާޅުވީ "ރައްޔިތުންނަށް ދެރަ ދިނީމަ ހަދަން ޖެހޭނީ އަމީނަށް ހެދި ގޮތް" ކަމަށެވެ.
މިވާހަކަތަކާއި ގުޅިގެން އެޗްއާރުސީއެމުން ނެރުނު ބަޔާނެއްގައި ބުނީ ހިޔާލުފާޅުކުރުމުގެ ހައްގަކީ ވަރަށް ފުޅާގޮތެއްގައި ގާނޫނު އަސާސީން ދީފައިވާ ހައްގެއް ވިޔަސް، އެ ހައްގުގެ ބޭނުން ކުރަން ވާނީ ވަކި ހުދޫދެއްގެ ތެރެއިން އަނެކުންގެ ހައްގަށް އިހްތިރާމު ކުޑަނުވާގޮތަށްކަމަށެވެ.
ސިޔާސީ ޕާޓީތަކުން ކުރިޔަށް ގެންދާ ހަރަކާތްތައް ސުލްހަވެރިކަމާއި އެކު ކަނޑައެޅިފައިވާ ގާނޫނީ އިމުގެ ތެރެއިން ކުރިޔަށް ގެންދިޔުމަށް އެޗްއާރުސީއެމުން ވަނީ ގޮވާލާފައެވެ.